Bashar Asad Suriyadagi mojarolar xususida qarashlarini bildirdi

Suriya prezidenti Bashar Asadning bayonotiga ko‘ra, IShID terrorchilik guruhi jangarilarining Palmiraga hujumi va uni egallab olishi Suriya hukumat qo‘shinlarining Halabdagi harakatlariga javob bo‘lgan. Asad RT telekanaliga bergan intervyusida shunday fikrni bildirgan. 

IShID jangarilari 10 dekabrda Palmiraga yurishni boshlagan va tinch aholi vakillari ko‘chirilgan shahar chekka hududlarini egallab olgan edi. "Agar siz ushbu hujum vaqtiga e'tibor bersangiz, uning Halabdagi jarayonga bog‘liq ekanini ilg‘aysiz. Ular Suriya armiyasining Halabdagi yurishini barbod qilib, diqqatini chalg‘itishga urinmoqda", — degan Asad. 

Rossiya harbiylarining so‘zlariga ko‘ra, IShID Raqqadagi kuchlaridan sezilarli qismini Palmiraga safarbar etgan. AQSh va xalqaro koalitsiya kuchlari o‘tgan haftada terrorchilarga qarshi faol jangovar harakatlarni to‘xtatgan edi. Bundan tashqari, IShIDning yirik miqdordagi zirxli texnikalari Dayr az-Zor tumanidan Palmiraga tashlangan. 

Bashar Asad, shuningdek, G‘arb mamlakatlari jangarilarning Halabdagi qilmishlariga ko‘z yumayotganini ta'kidlagan. Uning fikricha, G‘arb terrorchilarning odamlarni Halabda qatl qilayotganiga e'tibor qaratmayapti, IShID jangarilarining Palmiraga hujumiga ham shunday munosabatda bo‘lmoqda. Ular, faqat Suriya armiyasining muvaffaqiyatini tanqid qilmoqda. 

"Agar Palmirani hukumat kuchlari egallab olganida, madaniy meros bo‘yicha turli xavotirlarga sabab bo‘lar edi. Agar biz Halabni terrorchilardan ozod qilsak, G‘arb mulozimlari va yetakchi OAV tinch aholi vakillari xususida qayg‘ura boshlashadi. Ular, aksincha jarayon bo‘lsa, ya'ni terrorchilar tinch aholi vakillarini o‘ldirishsa yoki Palmirani egallab olishsa hamda faqatgina Suriyaga emas, insoniyatga tegishli madaniy va tarixiy merosni yo‘q qilishsa, qayg‘urishmaydi", — deya bayonot bergan Asad.

Suriya rahbari, g‘arb mamlakatlari Rossiyani Damashqqa ta'sir o‘tkazishga undayotgani borasida ham qarashlarini ma'lum qilgan. Uning aytishicha, G‘arbning RFga murojaat qilib, Suriya armiyasining IShID terrorchilik guruhiga nisbatan yurishini to‘xtatishi borasida bosim o‘tkazishga chaqirishi, aynan ushbu yurishni to‘xtatishga urinayotganini bildiradi. 

O‘tgan haftada, Germaniya, Fransiya, Buyuk Britaniya, Italiya, Kanada va AQSh rahbarlari qo‘shma bayonotlarida Rossiya va Eronni Halabdagi vaziyat yuzasidan Suriya hukumatiga bosim o‘tkazishga undagan edi. 

"Siyosatda gap nimadaligini anglash juda muhim. Ular nimani so‘rayotgani asosiy masala emas. Ularning Rossiya uchun bayonoti quyidigacha edi: "Iltimos, Suriya armiyasining terrorchilarga qarshi yurishini to‘xtating". Mana shu ularning bayonoti mazmuni. Qolganini unuting. Ular terrorchilarni himoya qilishda haddan oshib ketmoqda. Bundan boshqacha bo‘lishi mumkin emas. Ular aksincha, bas qiling, biz terrorchilarni yo‘q qilishimiz kerak, deb aytishlari lozim edi", — deya javob bergan Bashar Asad jurnalistlar savoliga.