Ozarboyjon poytaxti Boku shahrida erkin va yunon-rum kurashlari bo‘yicha kadetlar o‘rtasida an'anaviy xalqaro turnir bo‘lib o‘tdi. Unda 2000-2002 yillarda tug‘ilgan o‘smir sportchilar ishtirok etishdi. O‘zbekiston terma jamoasi a'zolari musobaqada har ikkala yo‘nalishda gilamga chiqishdi. Bu haqda O‘zbekiston Milliy olimpiya qo‘mitasi matbuot xizmati xabar berdi.
Ikki kunlik bellashuvlar yakuniga ko‘ra o‘zbekistonliklar jami 12ta medalga sazovor bo‘lishdi. Shulardan 3 tasi oltin, 4 tasi kumush va 5 tasi bronza medallari.
Jumladan, yunon-rum kurashi bo‘yicha Laziz Toshkentboyev (42 kg) va Sharofiddin Ernazarov (100 kg) 1-o‘rinni qo‘lga kiritgan bo‘lsa, Akmal Akramov (54 kg), Yergali Ayximbayev (76 kg) 2-o‘rinni egallashdi. Uchinchi o‘rin esa Eldor Karimov (46 kg), Javohir Samatov (58 kg) va Muhammadqodir Rasulovga (63 kg) nasib etdi.
Erkin kurash bo‘yicha Umid Jalolov (42 kg) 1-o‘rin,
Jamshid Ma'rufov (50 kg), Feruz Yakubov (58 kg) 2-o‘rin,
Arslon Rahimov (46 kg), Ixtiyor Normurodov (63 kg) 3 – o‘rinni egalladi.
