Xitoyda robot-jurnalistning ilk maqolasi chop etildi

Media sohasi ekspertlari jurnalist kasbi kelajagi xususida muhokamalar olib borayotgan, butun dunyoda o‘n minglab talabalar jurnalistlik sohasi bo‘yicha soha fakultetlarida ta'lim olayotgan bir vaqtda, Xitoyda ishlab chiqilgan Syao Nan nomli robot-muxbir mahalliy gazetada o‘zining maqolasini chop etdi. 

China News agentligiga ko‘ra, Syao Nanning 300 iyeroglifdan iborat maqolasi Southern Metropolis Daily gazetasida chop etilgan. U o‘z materialini Xitoy yangi yili arafasida safarlar avj olishiga bag‘ishlagan. 

Robot maqolasini yozib tugatishi uchun bir soniya kifoya qildi. Media-robotni ishlab chiqqan Pekin universiteti professori Van Syaotszyunning so‘ziga ko‘ra, Syao Nan kichik va katta matnli maqolalarni ham yoza oladi.

"6 nafar muxbirga bilan qiyoslaganda Syao ma'lumotlarni yaxshiroq tahlil qila oladi va matnlarni tezroq yozadi", — deydi professor.

Ammo, bu aqlli robotlar, tez orada, jurnalistlarning o‘rnini to‘liq egallashini anglatmaydi. Chunki, mashina tet-a-tet shaklida intervyular o‘tkazish bir yoqda tursin, qo‘shimcha savollar bera olmaydi, deb izohlagan professor. Bundan tashqari, robot intervyu uchun muloqot mavzusi yoki "yangiliklar manbasi"ni tanlay olmaydi. 

Shunga qaramay, olim yangi texnologiyalar kelajagi borasida ijobiy fikrda. 

Hozirda, u Southern Metropolis Daily bilan birga media-robotlarni rivojlantirish va o‘rganish bo‘yicha laboratoriya tashkil etish borasida bosh qotirmoqda.