Saratonga chalingan 8 yoshli qizcha Trampga videomurojaat yo‘lladi

AQShning Arizona shtatidan bo‘lgan sakkiz yoshli onkologik kasallik bilan og‘rigan qizcha AQSh prezidenti Donald Trampga videomurojaat yo‘lladi. Qizcha davlat rahbaridan bolalar saraton xastaliklari bilan kurashga yo‘naltirilgan moliyalashtirishni oshirishni iltimos qildi. Ebriel Bentli o‘z videosini Facebook’dagi sahifasida taqdim etgan.

Qizcha Trampni Milliy onkologiya institutini (National Cancer Institute) moliyalashtirishga yordam berishga chaqirgan hamda bolalar saraton xastaliklari sohasidagi tadqiqotlarga barcha mablag‘larning atigi to‘rt foizi ajratilishini eslatib o‘tgan.

«Bizlardan ba'zilar kimyoterapiyaning salbiy ta'siri oqibatida vafot etmoqda. Bu bizning kichik jussalarimiz uchun juda ham kuchli jarayon. Bu noto‘g‘ri», - dedi Bentli. U shuningdek o‘zining davolash jarayoni fotoxronikasini ham ko‘rsatdi.

«Iltimos, Amerikani yana buyuk qilishda bizni esdan chiqarib qo‘ymang», - deya Trampga murojaat qildi qizcha.

U shuningdek davlat rahbaridan Oq uyni bir kunga bo‘lsa-da oltin rangli illyuminatsiya bilan bezatishni so‘radi – aniqlik kiritilishicha, bu bolalar onkologiyasi bilan kurash rangi ekan.

Ebriel roligini bir hafta davomida 400 ming marotaba tomosha qilishdi.

Ma'lumot uchun, qizchada suyak saratoni, Yuing sarkomasining tajovuzkor formasi 2015 yilda aniqlangan. Jarrohlik amaliyoti va 17ta kimyoterapiya jarayonidan so‘ng shifokorlar kasallik rivojlanish kuchini biroz pasaytirishga erishishdi.