FVV Tulada 3 nafar O‘zbekiston fuqarosi halok bo‘lgani yuzasidan xabarnoma chiqardi

Rossiya Federatsiyasi Favqulodda vaziyatlar vazirligi ma'lumotiga ko‘ra, 2017 yil 10 fevral kuni Moskva vaqti bilan 16:05da Tula oblasti Chernsk tumani Popovka qishlog‘idagi “Maksim Gorkiy” MChJ omborxonasining tom qismi qulab tushishi sodir bo‘lgan, deb yozadi O‘zbekiston Favqulodda vaziyatlar vazirligi axborot xizmati. 

Xabarda aytilishicha, 3 nafar O‘zbekiston Respublikasi fuqarolari voqea joyida halok bo‘lgan, ularning barchasi 1992 yilda tug‘ilgan.

Hozirgi vaqtda O‘zbekiston Respublikasi FVV va TIV tomonidan vafot etganlarning oila a'zolariga zaruriy yordam ko‘rsatish choralari olib borilmoqda, deya yakunlanadi FVV xabari.

Avvalroq fojia sabzavotlar saqlash binosi tomi konstruksiyasining eskirib ketgani sabab ro‘y bergani haqida xabarlar tarqalgandi.