Ekvadorda yangi prezident saylanmoqda

Ekvador fuqarolari 19 fevralda mamlakatda o‘tadigan saylovlarning 1-bosqichida keyingi 4 yilga prezident saylashadi. Shuningdek, mamlakat parlamentiga ham yangi deputatlar saylandi.       

Bu oxirgi 10 yil ichida mamlakatning amaldagi prezidenti Rafael Korrea ishtirok etmayotgan ilk saylovlar bo‘ladi. Biroq u saylovoldi kampaniyasida faol ishtirok etib, "PAIS alyansi" blokidan nomzod, sobiq vitse-prezident Lenin Morenoni qo‘llab-quvvatladi.  

Mamlakat prezidenti lavozimiga 1998 yildan beri nogironlar aravachasida harakatlanadigan Morenodan tashqari yana 7 nomzod kurash olib boradi. Biroq kuzatuvchilarning fikricha, ulardan ikki nafari prezident bo‘lishga haqiqatda real imkoniyatlarga ega. Bular sobiq bankir Gilermo Lasso va sotsial-xristian partiyasi vakili Sintiya Viteri.

Saylovlarda 50 foizdan ko‘proq ovoz to‘plagan nomzod avtomatik ravishda prezident bo‘ladi. Agar nomzod 1-bosqichda 40 foizdan ko‘proq ovoz bilan o‘z ortidan kelayotgan eng yaqin raqibidan 10 foiz ko‘proq ovoz to‘plasa ham prezident bo‘la oladi. Qolgan boshqa vaziyatlarda 2-bosqich o‘tkaziladi.

Oxirgi ma'lumotlarga ko‘ra, mamlakatda 12,8 mln kishi ovoz berish huquqiga ega. Ekvadorda saylovlar 18 yoshdan 65  yoshgacha bo‘lgan barcha uchun majburiydir. Saylovlarda ishtirok etmaganlik uchun jarima ko‘zda tutilgan va uning miqdori 37,5 dollarni tashkil qiladi.