Amerikaning Apple kompaniyasining bayonot berishicha, so‘nggi iOS dasturiy ta'minotidagi smartfonlar xavfsizligi bilan bog‘liq nuqsonlarning katta qismi tuzatilgan. Bu nuqsonlar haqida WikiLeaks saytida so‘z yuritilgan edi.
«Dastlabki tahlil shuni ko‘rsatdiki, bugun e'lon qilingan nuqsonlarning aksariyati dasturiy ta'minotning so‘nggi namunasida tuzatilgan. Biroq, biz har qanday zaifliklarni zudlik bilan bartaraf etish ustida ishlaymiz», - deyiladi bayonotda.
7 mart kuni Wikileaks sayti MRB (AQSh Markaziy razvedka boshqarmasi) Kiberjosuslik Markazining ichki tarmog‘idan olingan 9 ming hujjatni e'lon qilgan edi. Hujjatda Windows, MacOS va Linux kabi dasturiy ta'minotlar hamda tarmoq routerlari va marshrutizatorlaridagi foydalanuvchini tinglash imkonini beruvchi maxfiy dasturlar haqida so‘z boradi. Bunda, maxsus xizmatlar dasturiy ta'minotlardagi yopilmagan zaiflik va nuqsonlardan o‘zlarini qiziqtirgan shaxslarning yozishmalariga kirishda foydalangan.
MRB, hisobotga ko‘ra, WhatsApp, Telegram va Signal kabi messenjerlardan xabarlarni olgan, «aqlli televizorlar»ga kirgan.
Aytish joizki, hozircha, Apple ushbu hisobot yuzasidan oshkora izoh bergan yagona kompaniya bo‘lib qolmoqda. MRB Wikileaks fosh etishiga qarashini bildirmagan.
