Farg‘ona viloyatining Buvayda tumani Nayman qishlog‘i so‘nggi yillarda butunlay yangicha qiyofa kasb etdi. Ilgari naymanliklar faqat ziravor ekib, ro‘zg‘or tebratgan bo‘lsa, bugun dehqonchilikda nafaqat tuman, balki butun viloyatda ham mashhur, deb xabar beradi O‘zA agentligi.
Qishloq ahli tomorqachilikda o‘ziga xos maktab yaratgan. Har bir xonadon kichkina tomorqasidan yiliga o‘rtacha 20-50 million so‘m atrofida daromad olmoqda. Bahorgi ekin-tikin ishlari boshlanguniga qadar naymanliklar qalampir, pomidor, baqlajon kabi ekinlarni yetkazib berish bo‘yicha 10 million donadan ortiq ko‘chatga buyurtma olishdi.
– Tomorqamizdagi 10 sotixli issiqxonadan yiliga uch marta hosil olamiz, oilamizning yillik daromadi 45-50 million so‘m, – deydi 73 yoshli Akromjon ota Yoqubov. – Chol-kampir muborak haj safariga borib keldik, ikki o‘g‘lim nabiralarim bilan yangi qurilgan uylarda yashaydi. Oilamiz ixtiyorida 3 “Neksia”, 1 “Damas” avtomashinasi bor. 10 boshga yaqin qoramol, 50 ga yaqin naslli tovuq oilamizning sut-qatiq, tuxumga bo‘lgan ehtiyojini to‘liq qoplaydi, ortganini bozorga chiqaramiz.
Mahallaning Zakovat ko‘chasida istiqomat qiluvchi Abdusamat Egamnazarov tomorqasida 5 sotix issiqxona mavjud. Hozirgi kunda bu yerda yetishtirilgan bulg‘or qalampiri, pomidor ko‘chatlari xaridorlarga muntazir. Xonadon sohibining aytishicha, oila bahorgi dehqonchilikdan 22-25 million so‘m daromad olishni rejalashtirmoqda.
Mahallada tadbirkorlar, xizmat ko‘rsatish va servis shoxobchalari yildan-yilga ortib bormoqda, jinoyatchilikka deyarli barham berilgan.
