Tramp tarafdori bo‘lgan mijozga bepisandlik qilindi

AQShning Filadelfiya shahridan bo‘lgan buxgalter Greg Pyatek Nyu-Yorkdagi "Eng baxtli soat" bari ustidan sudga shikoyat qildi. Gap shundaki, erkak AQSh prezidenti Donald Tramp qo‘llab-quvvatlangan yozuvli bosh kiyimida bo‘lgani uchun bardan chiqarib yuborilgan.

Pyatekning aytishicha, u ikki do‘sti bilan barda hordiq chiqarayotgan bo‘lgan. Erkak va uning do‘stlari ularga xizmat ko‘rsatayotgan ofitsiantni yonlariga chaqirishganda, u mijozlar yoniga kelmagan. Aniqlanishicha, ofitsiantning bunday qilishiga Pyatek o‘tirgan stolda Trampning saylovoldi kampaniyasi shiori bo‘lgan "Amerikani yana buyuk qilamiz" degan yozuvli kepka turgani sabab bo‘lgan. Qolgan ofitsiantlar ham shu sabab mijozlarga xizmat ko‘rsatishmagan. 

Bundan ranjigan mijozlar bar ma'murini chaqirtirib, unga sifatsiz xizmatdan shikoyat qilishgan. Biroq ma'mur o‘z xodimlari yonini olib, barda Trampni qo‘llab-quvvatlovchilar xushlanmasligini aytgan. 

"Siz ketsangiz ham bo‘ladi, chunki hech kim sizga baribir xizmat ko‘rsatmaydi", deb aytgan ma'mur.

Endi Pyatek Manxetten sudida adolat qaror topishini istamoqda. Uning aytishicha, bar xodimlari uni kamsitishgan.