Prevyu. O‘zbekiston – Qatar uchrashuvi oldidan

Osiyo mintaqasidan JCh–2018 turniriga saralash bosqichi A guruhi 7-turida O‘zbekiston terma jamoasi Toshkentda Qatar futbolchilariga qarshi bahs yuritadi. O‘FF sayti ushbu uchrashuv uchun prevyu tayyorlagan.

Mazkur o‘yin 28 mart, seshanba kuni Toshkent shahridagi 34 ming muxlisga mo‘ljallangan «Bunyodkor» stadionida bo‘lib o‘tadi. Bellashuv soat 18:00da boshlanadi.

O‘zaro uchrashuvlar

O‘zbekiston terma jamoasi Qatarga qarshi 12ta bellashuvda ishtirok etib, 7 marta g‘alaba qozongan. 3 o‘yinda qatarliklar zafar quchgan va 2ta o‘yinda tomonlar murosa ko‘chasini tanlagan. Qatar terma jamoasi Toshkentda 4 marta mehmon bo‘lib, barchasida imkoniyatni boy bergan.

Jamoalar o‘rtasidagi so‘nggi 5 uchrashuv natijasi:

06.09.2016
Qatar – O‘zbekiston 0:1 | JCh–2018 saralashi

06.10.2014
Qatar – O‘zbekiston 3:0 | O‘rtoqlik uchrashuvi

18.06.2013
O‘zbekiston – Qatar 5:1 | JCh–2014 saralashi

16.10.2012
Qatar – O‘zbekiston 0:1 | JCh–2014 saralashi

07.01.2011
Qatar – O‘zbekiston 0:2 | Osiyo Kubogi–2011 saralashi

FIFA reytingidagi o‘rni

O‘zbekiston milliy terma jamoasi ayni damda 561 ochko bilan FIFA reytingida 63-pog‘onada. Osiyo mamlakatlari orasida milliy terma jamoa Eron, Janubiy Koreya, Yaponiya, Avstraliya va Saudiya Arabistonidan keyin oltinchi o‘rinda joylashgan.

Qatar terma jamoasi 415 ochko bilan jahon reytingida 84-pog‘onada bormoqda. Osiyo mamlakatlari orasida esa Qatar yuqoridagi mamlakatlar va BAAdan keyin 8-o‘rinda.

Yo‘qotishlar

O‘zbekiston terma jamoasi himoyachisi Vitaliy Denisov jarohati tufayli, Islom To‘xtaxo‘jayev esa sariq kartochkalari to‘planib qolgani uchun Qatarga qarshi o‘yinda ishtirok etmaydi.

Qatar safida Bualem Xuxi Eron bilan bahsda ogohlantirish olgandi va shu sababli bitta o‘yinga diskvalifikatsiya qilindi.

Uchrashuv rasmiylari

Uchrashuv bosh hakami etib iroqlik Muhammad Qosim Sarray tayinlandi. Qanotlarda uning hamyurtlari Muhammad Muayyad Ali va Vothiq Obaid al-Suaydi ishlaydi.

To‘rtinchi hakam vazifasini ham iroqlik Zoid Tamer Muhammad bajaradi. Hakamlar nazoratchisi – Yoqub Muhammad Rodzali (Malayziya). Uchrashuv komissari etib hindistonlik Prints Rufus tayinlandi.

Guruhdagi vaziyat

JCh–2018 turniriga Osiyo mintaqasidan saralash bosqichi A guruhi 6-turidan keyin Eron terma jamoasi 14 ochko bilan peshqadamlik qilmoqda. 6-turda mag‘lubiyatga uchragan Janubiy Koreya 10 ochko bilan 2-o‘rinni saqlab qoldi. Safarda Suriyaga imkoniyatni boy bergan O‘zbekiston terma jamoasi 9 ochko bilan uchinchi o‘rinda joylashgan. Keyingi o‘rinlarda mos ravishda Suriya (8 ochko), Xitoy (5 ochko) va Qatar (4 ochko) terma jamoalari bormoqda.

Bugun, 28 mart kuni A guruhida shuningdek, Eron terma jamoasi o‘z maydonida Xitoyni qabul qiladi. Suriya termasi esa Janubiy Koreya mehmoni bo‘ladi.

JCh–2018 saralashi
A guruhi, 7-tur
Janubiy Koreya – Suriya (16:00 )
Eron – Xitoy (17:00)
O‘zbekiston – Qatar (18:00)