OAV: IShID Mo‘sulda ayol-merganlardan foydalanmoqda

IShID terrorchilik guruhi Mo‘sul g‘arbiy qismida iroqlik harbiylarga qarshi ayol-merganlar otryadlaridan foydalanmoqda.

Bu haqda As Sumaria telekanali Naynava viloyati kuch tuzilmalaridagi manbaga asosan xabar berdi.

Telekanal ma'lumotiga ko‘ra, «IShID ayol-merganlari Mo‘sulning jangarilar nazoratida bo‘lgan tumanlaridagi binolar tomida joylashib olgan hamda hukumat kuchlari pozitsiyalariga o‘t ochmoqda». IShID dala qo‘mondonligi ayol-merganlarni «G‘arbiy Mo‘sulda iroqlik harbiylarga qarshi amaliyot davomida aksariyat merganlarini yo‘qotganidan so‘ng» foydalana boshladi, deya ta'kidlab o‘tgan manba.

So‘nggi ma'lumotlarga ko‘ra, Mo‘sul g‘arbiy mavzelarining 30 foizi radikallar nazorati ostida qolmoqda. Jangarilar tinch aholi vakillarini «tirik qalqon» sifatida ishlatmoqda, bu esa Iroq kuchlarining shaharning eski qismida harakatlanishini qiyinlashtirdi.