"Formula-1"ning Xitoy gran-prisi payshanba kuni Shanxayda boshlanadi. "Ferrari" jamoasi Melburndagi muvaffaqiyatdan so‘ng g‘alabali seriyani davom ettirish va mavsum favoriti "Mersedes" bilan kurash olib borishga umid qilmoqda.
Xitoy gran-prisi Shanxaydagi avtodromda 7-9 aprel kunlari bo‘lib o‘tadi. Birinchi bosqichdan so‘ng umumiy jadvalda "Ferrari" poygachisi Sebastyan Fettel (25 ochko) yetakchilik qilmoqda, ikkinchi o‘rinda "Mersedes" vakili Lyuis Hemilton bo‘lsa, uchinchi pog‘onada uning jamoadoshi Valtteri Bottas (15) bormoqda.
"Ferrari" VS "Mersedes"
"Ferrari" chempionatning birinchi bosqichidayoq mavsumoldi testlar natijalari va mutaxassislar bashorat asossiz bo‘lmaganini ko‘rsatdi, hamda bu mavsumda nafaqat jahon chempionligi uchun, balki konstruktorlar Kubogi uchun ham kurash olib borishga umid qilmoqda.
Shu bilan birga, chempionat yetakchisi juda kamtarona izohlar bergan. "Sovrin uchun poyga juda uzun yo‘ldan iborat. Ayni damda Avstraliyadagi muvaffaqiyatdan keyin yettinchi osmonda suzib yurgandekmiz, go‘yo. Mening startdan unchalik ko‘nglim to‘lmadi, biroq bosim o‘tkazishga intildim hamda kurash olib borishga tayyor ekanligimni ko‘rsatib qo‘ydim. Biroz omad ham yordam berdi", - deya aytib o‘tdi Fettel.
Statistikani yodga olgan holda shuni ta'kidlab o‘tish joizki, aynan "Ferrari" va "Mersedes" ayni damda Xitoy Gran-prisidagi g‘alabalar soni bo‘yicha bir xil ko‘rsatkichga ega – bu jamoalar Shanxayda to‘rt bora yutishgan. Shanxayda to‘rt marta tengsiz bo‘lgan Hemiltonga trassa Fetteldan Melburndagi mag‘lubiyat uchun qasos olishga yaxshi imkoniyat beradi.
Xitoy Gran-prisidagi birinchi va ikkinchi erkin amaliyotlar Shanxayda juma kuni bo‘lib o‘tadi, ular Toshkent vaqti bilan 07:00 va 11:00da o‘tkaziladi. Uchinchi erkin amaliyot esa 8 aprel kuni o‘tkaziladi va Toshkent vaqti bilan 09:00da bo‘lib o‘tadi, shundan so‘ng saralash bahslarini o‘tkazish rejalashtirilgan. Poyga esa 9 aprelga mo‘ljallangan hamda Toshkent vaqti bilan 11:00da boshlanadi.
