Germaniya TIV Suriyadagi vaziyat AQSh va Rossiya urushiga olib kelishi ehtimoliga munosabat bildirdi

Germaniya Tashqi ishlar vaziri Zigmar Gabrielning fikr bildirishicha, Suriyadagi mojaroni Rossiya ishtirokisiz bartaraf etib bo‘lmaydi. Bu haqda uning Bild uchun bergan intervyusida aytilgan.

"Men rossiyalik hamkasbim Sergey Lavrov bilan qalin aloqalarni davom ettiraman. Moskva ishtirokisiz Suriya muammosini hal etib bo‘lmaydi. Menda Rossiya Asadni abadiy himoya qiladi, degan tasavvur yo‘q", degan u.

Uning fikricha, mavjud ziddiyatni "AQSh, Rossiya va mintaqadagi boshqa asosiy o‘yinchilar ishtirokidagi siyosiy muzokaralar orqali" hal qilish va insonlarning uqubat chekishiga chek qo‘yish mumkin.

Yangi eskalatsiyaga yo‘l qo‘ymaslik
Vazirdan ish AQSh va Rossiya o‘rtasida ochiq urush boshlanib ketishi ehtimoli haqidagi fikri so‘ralgan.

"Yo‘q. AQSh o‘z harbiy rejalaridan Rossiyani voqif etib bormaganida ham shu fikrni aytardim", degan u.

Shu bilan birga hozirda xalqaro maydonda "sovuq urush davridan buyon eng tarang vaziyat yuzaga kelgani"ni qayd etib o‘tgan.

"Barcha tomonlar hozirda hushyor turishi kerak. Bizga navbatdagi eskalatsiya kerak emas", degan GFR TIV rahbari.

Vazir Germaniya hukumati Idlibda Bashar Asad hukumati kimyoviy qurol qo‘llagan degan fikrda ekanini ma'lum qilib o‘tgan.

U BMT va kimyoviy qurollar qo‘llanishiga qarshi tashkilotning mutaxassislari vaziyat yuzasidan tekshiruvlar o‘tkazishi kerakligini ta'kidlagan.

Shu bilan birga u Germaniya AQShning Suriya armiyasi pozitsiyalariga qarshi navbatdagi hujumlarda ishtirok etishi ehtimolini rad etgan.

"Bundestag qabul qilgan mandat faqat IShIDga qarshi kurashni nazarda tutadi, biz Suriyaga qarshi urushmaymiz", degan u.

Bashar Asad davri ortda qoldi
"Men juda ham umid qilamanki, xalqaro hamjamiyat ko‘rsatadigan bosim Bashar Asad tuzumiga xalqaro tartiblarni buzgan holda aholiga zaharli gaz qo‘llashga va beayb odamlar, ayollar va bolalarni o‘ldirishga yo‘l qo‘ymaydi", deya davom etgan germaniyalik vazir.

"Kimyoviy qurol qo‘llanishi - bu xalqaro normalarning qo‘pol ravishda buzilishidir. Asadning jallodlari ishi harbiy jinoyatdir", degan u.

"Ayni vaqtda ko‘plab kishilar Asad rejimidan aziyat chekmoqda. Men ishonamanki, ertami kechmi Asad jinoyatlari uchun javobgarlikka tortiladi. Uning davri ortda qolmoqda", degan vazir.

Eslatib o‘tamiz, 7 aprelga o‘tar kechasi AQSh harbiy-dengiz kuchlarining ikki kemasidan Suriyaning Homs viloyatidagi Shayrat aerodromi tomon 59ta «Tomagavk» qanotli raketalari uchirildi. Shundan so‘ng, Rossiya prezidenti Vladimir Putin AQShning Suriyadagi aviabazaga hujumini suveren davlatga qarshi tajovuz deb hisoblashini bildirdi. Ko‘p vaqt o‘tmasdan Rossiya Suriyada ko‘zda tutilmagan holatlarning oldini olish haqidagi memorandum amalda bo‘lishini to‘xtatgani haqida xabar paydo bo‘ldi.