AQSh KXDR ehtimoliy hujumi tufayli Okinavada mashqlar o‘tkazdi

AQSh harbiy qo‘mondonligi Yaponiyaning Okinava orolidagi “Kadena” aviabazasida mashqlar o‘tkazdi. Bu Shimoliy Koreya tomonidan zarba berilsa, bunga tayyorgarlik maqsadida amalga oshirilgan, deb xabar bermoqda Kiodo agentligi.

Mashqlar 12-14 aprel kunlari o‘tkazilgan, biroq ular haqida ma'lumot endigina paydo bo‘ldi. Ularda Shimoliy Koreya tomonidan ehtimoliy hujum holatiga oid tayyorgarlik ishlari olib borilgan. KXDR navbatdagi raketa sinovini 4 aprel kuni o‘tkazganidan so‘ng, AQShning Shimoliy Koreyaga ehtimoliy zarbasi haqida gap-so‘zlar ko‘paydi.

Yaponiya va Janubiy Koreyada AQSh prezidenti Donald Trampning KXDRga ta'sir ko‘rsatish bo‘yicha barcha variantlar ko‘rib chiqilayotgani haqidagi bayonotlari, shuningdek AQShning “Karl Vinson” atom aviatashuvchisi boshchiligidagi zarba berish aviaguruhining Koreya yarim oroliga yo‘l olgani tashvish uyg‘otmoqda.

AQSh ittifoqchisi bo‘lgan har ikki davlat ham Vashingtonning Shimoliy Koreyaga nisbatan barcha choralarini qo‘llab-quvvatlashi ehtimolga yaqin, biroq ular KXDR javob harakatini amalga oshiruvchi hududga aylanishi ham mumkin. Shimoliy Koreya uchun asosiy nishonlarga Yaponiya va Janubiy Koreyadagi Amerika bazalari aylanishi ehtimolga yaqin.