Erdo‘g‘an Iroq va Suriyada kurdlarga hujumlar davom etishini bildirdi 

Turkiya prezidenti Rajab Toyib Erdo‘g‘an ma'lum qildiki, mamlakat harbiy-havo kuchlari Iroq va Suriya hududidagi kurdlarning pozitsiyalari bo‘ylab yangi zarbalar yo‘llashi mumkin. Bu haqda Associated Press agentligi xabar tarqatdi.

Shu bilan birga turkiyaliklar rahbari navbatdagi amaliyotlarning aniq sanasi haqida hech narsa deya olmasligini qo‘shimcha qilgan.

«Biz hujum vaqtini ma'lum qila olmaymiz. Ammo ular turk armiyasi kelishi mumkinligini bilishadi», — degan u.

Aprel oyining ikkinchi yarmida Turkiya harbiy samolyotlari Iroq va Suriya hududidagi kurdlarga hujum qila boshladi. 29 aprel kuni ham Turkiya HHK Kurdiston ishchilar partiyasining Iroq shimolidagi pozitsiyalariga zarbalar berdi. Rasmiy Anqara Iroq shimoliga berilgan aviazarbalar natijasida 14 nafar kurd jangarisi o‘ldirilganini bildirdi.