Alisher Usmonov Buyuk Britaniyaning eng badavlat odamlari yuqori beshtaligiga kiritildi 

Rossiyalik tadbirkor Alisher Usmonov 2017 yil holatiga ko‘ra, Buyuk Britaniyaning eng badavlat odamlari yuqori beshtaligiga kiritildi.

"Metalloinvest" kompaniyasi egasi va Londonning "Arsenal" futbol klubi aksiyadori hisoblanmish Usmonovning boyligi 15,3 mlrd dollarga baholangan.

The Sunday Times nashri tomondan tuzilgan The Sunday Times Rich List 2017 ro‘yxatining eng yuqori pog‘onasini bank va restoran biznesi bilan shug‘ullanuvchi, hind millatiga mansub aka-uka Shri va Gopi Hindujalar (16,2 mlrd funt sterling) egalladilar. Ular Hinduja Group korporatsiyasiga egalik qilishadi.

2-o‘rinni Sobiq ittifoqdan 1978 yilda AQShga migratsiya qilgan Leonard Blavatnik (15,98 mlrd funt sterling) egalladi. U Warner Music Group kompaniyasi va dunyoda polipropilen ishlab chiqaruvchi eng yirik korxona LyondellBasell Industries NV’ni nazorat qiluvchi Access Industries xolding kompaniyasi asoschisi va raisi hisoblanadi.

3-o‘rinni esa aka-uka Devid va Saymon Rubenlar (14 mlrd funt sterling) egallamoqdalar. Kelib chiqishi hindistonlik bo‘lgan Rubenlar nashrning avvalgi yilgi reytingiga boshchilik qilgandilar.

Ta'kidlash joiz, ushbu ro‘yxatning 13-pog‘onasidan yana bir rossiyalik tadbirkor, "Chelsi" klubi egasi Roman Abramovich o‘rin oldi.

Sky News nashrining ma'lum qilishicha, ro‘yxatdan hammasi bo‘lib 134 kishi o‘rin olgan. Ta'kidlanishicha, ayni vaqtda Buyuk Britaniyada uning tarixidagi eng ko‘p sondagi milliarderlar mavjud.  

Reytingga kiritilgan barcha milliarderlarning umumiy boyligi 658 mlrd funt sterlingga baholangan va bu miqdor 2016 yilgi ko‘rsatkichdan 14 foizga ko‘proqni (575 mlrd funt sterling) tashkil qilgan.