Irlandiyada havaskor baliqchi ulkan akulani qarmoqqa tutdi

Irlandiya sohillari yaqinida havaskor baliqchi, 26 yoshli Ben Bond 6 oyquloqli ulkan akulani qarmoqqa ilintirdi. Ta'kidlanishicha, tutilgan akulaning uzunligi 7,5 metrni, og‘irligi esa  680 kg ga yaqinni tashkil qilgan. Bu haqda BBC telekanali xabar bermoqda. 

Tutilgan akula Yevropada qarmoqqa tutilgan bu turdagi eng katta akula bo‘ldi. Baliqchi bir o‘zi akula bilan 1,5 soatlik kurashdan keyin uni sirtga chiqarib, suratga olgan va yana ozodlikka qo‘yib yuborgan.

Bondning aytishicha, u avval ham akulalar tutgan, biroq bunday katta akulani birinchi marta tuta oldi. Uning aytishicha, u akulani suvdan chiqarayotganda qo‘rquv his qilmagan. 

"Menimcha, eng yoqimlisi u suzib ketayotganini kuzatish bo‘ldi. Men bunday ajoyib jonzotni o‘ldirishni istamadim", deb aytgan Bond.

Irlandiyaning baliqchilik boshqarmasi vakillari suratga olingan akulani "dengiz tublarining haqiqiy mahluqi" deb atashgan. 

Olti oyquloqli akula ko‘p oyquloqlilar oilasining eng katta vakili hisoblanadi. Bunday akulalarning uzunligi odatda 5,5 metrdan oshmaydi.