Janubiy Koreyada muddatidan oldingi prezidentlik saylovlari bo‘lib o‘tmoqda

Sobiq prezident Pak Kin He o‘z lavozimidan chetlashtirilgach, Janubiy Koreyaning millionlab fuqarolari mamlakatning yangi prezidentini saylash jarayonida ishtirok etishmoqda.

Katta korruptsion mojaroga aralashib qolgan sobiq prezidentga impichment e'lon qilindi, so‘ngra prezident hibsga olinib, unga nisbatan bir qator, jumladan, pora olish va xizmat vazifasini suiiste'mol qilish kabi ayblovlar e'lon qilindi.

Seuldagi saylov uchastkalari asosan kvartallar o‘rtasidagi, topib borish qiyin bo‘lgan hudud boshqaruvi binolarida — kichikroq ofislarda tashkillashtirilgan. Ovoz berish xonasining har biriga «Saylov — demokratiya chechagi» degan yozuvlar yopishtirib chiqilgan.

Seulning markaziy hududi Hvehyon-dondagi saylov uchastkasi ochilgani hamono ovoz berish uchun uning eshigi oldida asosan katta yoshli kishilardan iborat navbat hosil bo‘ldi.

«Mamlakatimizning qayta tug‘ilishi uchun aqlli rahbarni tanlab bo‘ldim», — deydi RIA Novosti’ga Hvehyon-dondagi saylov uchastkasida ovoz berib chiqqan Ha ismli ayol. Saylovchining so‘zlariga ko‘ra, «avvalgidek yashashning ortiq iloji yo‘q, mamlakat manfaati uchun intilish kerak».

Yevropacha libos kiyib olgan Kim familiyali yigitcha ham Janubiy Koreyada o‘zgarishlar ro‘y berishidan umidvorligini aytib o‘tgan. «Mamlakatimizda hukumat o‘zgarishini ko‘zlab ovoz berdim», — dedi u. Kim Janubiy Koreyadagi hukumat «avvalgisidan adolatliroq, jamiyat esa barcha uchun birdek imkoniyatlar taqdim etilgan holatda bo‘ladi», deya ishonadi.

Jamoatchilik fikrini o‘rganish uchun o‘tkazilgan so‘nggi so‘rovlarga ko‘ra, prezidentlik lavozimi uchun asosiy nomzodlar — demokratik partiyadan Mun Je Inni 42,4 foiz kishi qo‘llab quvvatlagan, markazchilarning «Xalq partiyasi» vakili An Chyol Su va konservativ kuchlar vakili Xon Jun Pyo hozircha 18,6 foizlik reytingdan ko‘tarila olishmagan.

Demokratik kuchlar tarafdorlari Janubiy Koreya jamiyatida korrupsiya qo‘porib tashlanishi va urush tahdidi oldi olinishi uchun KXDR bilan munosabatlar yaxshilanishidan umidvor. Bular asosan yosh avlod vakillari. Katta yoshdagi kishilar esa Pyongyang bilan yaqinlashishdan cho‘chib, konservatorlarga ovoz berishmoqda.

Katta yoshdagi taksi haydovchisi Xon Jun Pyoga ovoz berganini, u bu qarorini demokratik kuchlardan saylangan sobiq preziyentlar Kim De Jun va No Mu Hyon davridagidek, yangi prezident Pyongyangga borishini istamayotgani bilan izohlagan.

«Kim De Jun Pyongyangga bordi, keyin No Mu Hyon ham bordi, ulardan biror kishi Seulga keldimi?» — deya savol beradi taksichi. Bu safar ham xuddi shunaqa bo‘ladi, degan qat'iy fikrda u, Janubiy Koreyaning yangi prezidenti ham Pyongyangga borib, «pul berib» keladi. 1950-1953 yillardagi urushni juda yaxshi eslaydigan janubiy koreyalik katta avlod vakillarining aksariyati ana shunday fikrda. Ular AQShning harbiy qudrati va KXDRning yakson qilinishi ortidan mamlakat birlashtirilishidan umidvor.

Janubiy Koreya ommaviy axborot vositalarining ma'lumotlariga ko‘ra, ushbu saylov soliq to‘lovchilarga 311 mlrd. von (274 mln. dollar) ga tushadi. MSK 180 mlrd. vonni o‘z mablag‘laridan sarflaydi, deb xabar beradi Yonhap agentligi, 42,1 mlrd. von esa Janubiy Koreyaning bir palatalik parlamenti — Milliy majlisdan o‘rin olgan besh siyosiy partiyani qo‘llab-quvvatlash fondidan ajratiladi. Shuningdek, MSK 88,9 mlrd vonni saylovlarda kamida 10 foiz ovoz olgan barcha nomzodlarning saylovoldi poygasidagi xarajatlarini qisman yoki to‘liq qoplash uchun ajratadi.

Koreya Respublikasining yangi prezidenti inauguratsiyasi MSKning 10 may kungi ertalabgi majlisida uning g‘alabasi rasman e'lon qilingach, mahalliy vaqt bilan soat 8:00 – 10:00 orasida o‘tkaziladi.