AQSh elchisi Andijonda

17 may kuni Amerika Qo‘shma Shtatlarining O‘zbekistondagi elchisi Pamela Spratlen boshchiligidagi delegatsiya Andijonga keldi. 

Viloyat hokimligi binosida elchi xonim hamda AQSh elchixonasi vakillarini kutib olish marosimi bo‘lib o‘tdi. Unda Andijon viloyat hokimining iqtisodiyot va tadbirkorlik masalalari bo‘yicha birinchi o‘rinbosari Abdujabbor Egamberdiyev, yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha hokim o‘rinbosari Serobiddin Ismoilov hamda ommaviy axborot vositalari vakillari ishtirok etdilar. 

Uchrashuv  davomida O‘zbekiston va AQSh davlati o‘rtasidagi  ikki tomonlama aloqalarning samarasi Andijon viloyatida ham o‘z aksini topib borayotgani haqida so‘z bordi. Spratlen xonim viloyatda olib borilayotgan ijtimoiy-iqtisodiy o‘zgarishlar ko‘lami, bunyodkorlik ishlari bilan tanishdi. Jumladan, Andijon viloyatidagi turizm, madaniy meros obektlari borasida savollariga javob oldi.

Ayni vaqtda viloyatga AQSh davlatidan bo‘yoq, rangli metall, mashina va asbob-uskunalar hamda kompyuter xizmatlari import qilinib, kimyoviy mahsulotlar, plastmassa mahsulotlari va moliyaviy xizmatlar eksport qilinmoqda. 

Hozirgi kunda viloyatda AQSh sarmoyasi ishtirokidagi 7 ta korxona faoliyat olib borayotgan bo‘lib, ushbu korxonalarda 9,5 mingdan  ziyod ishchilar faoliyat ko‘rsatib kelmoqdalar. Birgina hamkorlikning yorqin misoli sifatida “Jyeneral motors” korporatsiyasi sarmoyasi ishtirokidagi “JM O‘zbekiston” qo‘shma korxonasini keltirish mumkin. Ushbu korxona tomonidan o‘tgan yilning o‘zida 70 mingga yaqin "Kobalt", "Captiva", "Malibu" va boshqa turdagi zamonaviy yengil avtomashinalar ishlab chiqarilib, aholining turmush tarzini yaxshilashga xizmat qilmoqda.

Uchrashuvdan so‘ng AQSh elchisi Andijon Davlat Universitetida bo‘lib, o‘quv dargohida talabalar uchun yaratilgan sharoitlar bilan tanishdi. Oliygoh o‘qituvchilari bilan muloqotda bo‘ldi.

Pamela Spratlen "Bog‘i Bobur" majmuasida bo‘lib, so‘ng milliy hunarmandchilik bilan shug‘ullanuvchi usta kulollar  bilan uchrashishi ham ko‘zda tutilgan.   

Kun.uz muxbiri Elmurod Ermatov, Andijon