Bugun 26 may kuni Gruziya respublikasi poytaxti va yirik shaharlarida Mustaqillik kuni munosabati bilan tantanali marosimlar va xalq sayillari bo‘lib o‘tadi. Bu haqda Gruziya OAV xabar qilmoqda.
Bu yil bayram tantanalari "Men Rustaveli mamlakatidanman" shiori ostida tashkil etiladi. Shota Rustavelining mashhur "Yo‘lbars terisidagi jangchi" poemasi bayramning asosiy mavzusi bo‘ladi. Bu yil, shuningdek, afsonaviy shoirning 850-yilligi nishonlanadi.
An'anaga ko‘ra, Gruziya poytaxti va uning Rustaveli nomidagi asosiy shoh ko‘chasi tantanalar markaziga aylanadi. Aynan shu yerda Rustaveli shoh ko‘chasi va Ozodlik maydoni o‘rtasida ko‘ngilochar tomoshalar va konsertlar tashkil etiladi. Har bir vazirlik bajargan loyihalari va amalga oshiradigan islohotlari xususida axborot beradi.
Gruziya hukumati bu yil ham so‘nggi bir necha yillarda kuzatilayotgani kabi harbiy parad o‘tkazmaydi. Buning o‘rniga xalq sayillari tashkil etiladi. Ozodlik maydonida mahalliy vaqt bilan soat 12.00 (Toshkent vaqti bilan 13:00) 400ga yaqin yangi askar harbiy qasamyod qiladi, asosiy shoh ko‘chada harbiy texnikalar namoyish etiladi. Mamlakatning boshqa yirik shaharlarida ham harbiy eksponatlar namoyish etiladi.
Bayram kechasi Gruziya shou-biznesi gala konserti bilan yakunlanadi. Unda Gruziya prezidenti Georgiy Margvelashvili va bosh vaziri Georgiy Kvirikashvili ma'ruza qilishi belgilangan.
