Xitoyda uy quladi, qurbonlar bor

Xitoyning Shandun viloyatida qurilayotgan uyning qulashi natijasida olti kishi halok bo‘ldi. Bu haqda «Sinxua» xabar bermoqda.

Hodisa mahalliy vaqt bilan soat 9.50 da yuz bergan. Ishchilar voqea ro‘y berganda ikkinchi qavatni qurish bilan mashg‘ul bo‘lishgan.

Voqea joyiga politsiya va qutqaruvchilar yetib keldi. Ko‘plab ishchilar vayronalar ostidan evakuatsiya qilindi, biroq olti kishi halok bo‘lgan. Yana to‘rt nafar jabrlangan inson kasalxonaga yetkazildi, ularning ahvoli barqaror, deb baholanmoqda.

Ma'lum bo‘lishicha, qurilish noqonuniy ravishda olib borilgan. Ma'muriyatning ta'kidlashicha, hodisa uchun javobgar bo‘lganlar qo‘lga olindi.