Italiyada "Katta yettilik" sammiti yakunlandi. Tafsilotlar

Italiyaning Taormina shahrida "Katta yettilik" (G7) sammiti yaunlandi. Sammit ishtirokchilari yakuniy deklaratsiyani qabul qilishdi. Unda terrorchilikka qarshi kurashning muhimligi, Suriya va Iroqda IShIDga qarshi kurashni kuchaytirish, shuningdek, Minsk kelishuvlari bajarilmasa, Rossiyaga qarshi sanksiyalarning kuchaytirilishi mumkinligi ta'kidlab o‘tildi.      

Sammitda AQSh, Buyuk Britaniya, Kanada, Fransiya, Italiya, Germaniya va Yaponiya yetakchilari ishtirok etishdi. Ular terrorchilikka qarshi kurash, iqlim o‘zgarishi, migratsiya inqirozini hal qilish, Afrika davlatlariga epidemiyalar va ocharchilikka qarshi kurashda yordam berish masalalarini muhokama qilishdi.   

Yakuniy deklaratsiyada "yettilik" davlatlari Ukrainani qo‘llab-quvvatlashlarini tasdiqlashdi va Rossiya ushbu davlatdagi ixtilof uchun javobgar ekanligini ta'kidlab o‘tishdi.    

Sammit ishtirokchilari IShID manfaati yo‘lida jinoyat sodir etuvchilar va kimyoviy qurol qo‘llovchilarni jazolashga chaqirishdi. Ular, shuningdek, Rossiya va Erondan o‘t ochishni to‘xtatish tartibini kuchaytirish uchun Suriya rahbariyatiga ta'sir o‘tkazishni talab qilishdi.  

Jurnalistlar e'tiborini forumning yangi ishtirokchilari – AQSh prezidenti Donald Tramp va Fransiya prezidenti Emmanuel Makron tortdi. OAV bu ikki davlat rahbarlarining rafiqalari qanday kiyimda ekanliklariga e'tibor qaratishdi, ularning kiyimlari narxini taqqoslashdi va rasmiy tadbirlarda ishtirok etishlarini kuzatishdi.

Tramp sammitning 2-kuni uchrashuvga bir soatlik kechikish bilan keldi. Bundan tashqari, u Italiya bosh vaziri Paolo Jyentiloni sammitni italyan tilida ochayotganda tarjima uchun mo‘ljallangan quloqchinlardan foydalanishni joiz ko‘rmadi.  

Bunday tadbirlar uchun an'anaviy bo‘lib qolgan norozilik namoyishlari ham bo‘lib o‘tdi. Barcha xavfsizlik choralariga qaramasdan, sammit osoyishta aksiyalar bilan bir qatorda huquq-tartibot idoralari kuchlari bilan to‘qnashuvlarga aylanib ketgan norozilik namoyishlari bilan kechdi.

26 may kuni Greenpeace faollari sammit o‘tayotgan joy yaqinidagi Jardini-Nakso shaharchasida dengiz bo‘yida qutqaruv jileti kiydirib qo‘yilgan AQShdagi Ozodlik haykalining 4 metrlik nusxasini o‘rnatishdi. Norozilik namoyishi tashkilotchilarining aytishlaricha, ular shu tariqa siyosatchilar va jamoatchilikning e'tiborini iqlim o‘zgarishi va dunyo okeani sathining ko‘tarilishiga qaratishmoqchi bo‘lishgan.