Hokimliklar rahbarlariga xizmat uylari beriladi

Vazirlar Mahkamasining 19.05.2017 yildagi 299-son qarori bilan Joylardagi ijro hokimiyati organlari rahbarlari uchun xizmat uy-joylarini qurish, taqsimlash, foydalanish, saqlash va ta'mirlashni tashkil etish tartibi to‘g‘risidagi nizom tasdiqlandi. Bu haqda Norma.uz xabar bergan.
 
Xizmat uy-joylari namunali loyihalar asosida quriladi:

•  0,06 gektar yer uchastkasida joylashadigan 1 qavatli 5 xonali uy-joylar — Qoraqalpog‘iston Respublikasi Vazirlar Kengashi va viloyatlar hokimliklari rahbarlari uchun;

•  0,04 gektar yer uchastkasida joylashadigan va hovlisida qo‘shimcha binolari bo‘lgan 2 qavatli 4 xonali uy-joylar — tuman (shahar) hokimliklari rahbarlari uchun.
 
Bunda u mahalliy byudjyet mablag‘lari hisobiga mebel, maishiy texnika va boshqa xo‘jalik jihozlari bilan jihozlanadi.
 
Uy-joylarni joylardagi ijro hokimiyatining tegishli organlari birinchi rahbarlari taqsimlaydi. Xizmat uy-joyiga order xizmat uyiga joylashish va beg‘araz foydalanish bo‘yicha shartnoma tuzish uchun  asos bo‘ladi.
 
Xizmat uy-joylari bo‘linmaydi, almashtirilmaydi va xususiylashtirilmaydi. Ulardan belgilangan maqsaddan tashqari foydalanish yoki ularni ijaraga berish taqiqlanadi.
 
Ko‘rsatiladigan UJKX xizmatlari uchun to‘lovlar xizmat uy-joylarida yashayotgan davlat xizmatchilari yoki ularning oila a'zolari tomonidan o‘z mablag‘lari hisobidan yoki ish haqidan ushlab qolish yo‘li bilan to‘lanadi.
 
Amaldorlar o‘z lavozimidan ketgandan keyin xizmat uy-joylarini bo‘shatishi lozim.