1 yanvardan tajriba-sinov: tuman va shahar hokimliklari yangi tartibda ishlaydi 

2025 yil 21 oktyabrdagi prezident farmoniga muvofiq, tuman va shahar hokimliklari faoliyatini tubdan takomillashtirish bo‘yicha qo‘shimcha chora-tadbirlar belgilandi.

Farmonga ko‘ra, hokimliklarning asosiy vazifalari quyidagilardan iborat:

• “Aholi va tadbirkorlar manfaatlariga xizmat qilish” tamoyilini hayotga to‘liq joriy etish maqsadida hokimliklarni aholi va tadbirkorlarga kompleks xizmat ko‘rsatuvchi zamonaviy tuzilmaga aylantirish;
• mahalliy ahamiyatga ega masalalarni mustaqil hal etishda hokimliklarning ma’muriy vakolatlarini kengaytirish;
• hududiy rivojlanishga oid ustuvor vazifalar va mas’uliyat doirasini aniq belgilash.

2026 yil 1 yanvardan tajriba-sinov tariqasida “Yangi O‘zbekiston qiyofasidagi tuman (shahar)” maqomidagi 33 ta tuman va Surxondaryo viloyatining qolgan barcha tuman va shahar hokimliklari tuzilmasiga o‘tkaziladi.

Tajriba-sinov davrida:

• hokimlar respublika ijro etuvchi organlarning tuman va shahar bo‘linmalari faoliyati ustidan bevosita rahbarlik qiladi;
• hokim o‘rinbosarlarining soni Surxondaryo viloyatida 6 nafar, boshqa tuman va shaharlarda 4 nafar qilib belgilanadi.