Toshkent viloyatida bir haftada 76ta jinoyat «issiq izi»dan fosh etildi

Toshkent viloyati hududida 2017 yilning 25-31 may kunlari oralig‘ida 85ta jinoyat  sodir etilgani qayd etildi. Shundan: 5tasi qasddan badanga og‘ir shikast yetkazish, 1tasi bosqinchilik, 29tasi o‘g‘irlik, 12tasi giyohvandlik, 1tasi nomusga tegish, 1tasi transport vositasini olib qochish, 2tasi firibgarlik, 7tasi iqtisodiy va 24tasi boshqa jinoyatlarni tashkil qiladi.

Sodir etilgan 85ta jinoyatning 76tasi "issiq izidan" fosh etilgan va tezkor-tergov harakatlari olib borilmoqda, fosh etilmagan 9ta  (1tasi transport vositasini olib qochish, 6ta o‘g‘irlik, 1ta bosqinchilik, 1ta o‘zga jinoyatlar) jinoyatlar bo‘yicha aybdorlarni qidirib topish va ularni qonun doirasida javobgarlikka tortish borasida barcha choralar ko‘rilmoqda.

Bu haqda Toshkent viloyati IIBda bo‘lib o‘tgan matbuot brifingida ma'lum qilindi. Qidiruvda bo‘lganlardan jinoyatchilardan 18 nafari ushlanib, 8ta jinoyat fosh etildi.

Shu bilan birga, 2017 yilning yozgi mavsumida viloyat hududida joylashgan 49ta bolalar dam olish oromgohlarida 70 ming nafardan ortiq bolalar dam olishlari rejalashtirilgani munosabati bilan g‘amxo‘rlik ishchi guruhi tuzildi. Oromgohlarning 37tasi Bo‘stonliq tumanida, 4tasi Parkent tumanida, 2tasi Angren shahrida, 5tasi Bekobod shahri, Ohangaron, Piskent, Qibray va O‘rtachirchiq tumanida joylashgan.

Ishchi guruh a'zolari Toshkent viloyati Favqulodda vaziyatlar boshqarmasi bilan hamkorlikda bolalarni sog‘lomlashtirish oromgohlariga xavf soluvchi tabiiy omillar, oromgohlarning yong‘inga qarshi holati, harakat xavfsizligi holati va oromgohlarning atrof hududi o‘ralganligini monitoring tariqasida o‘rganib, ko‘rikdan o‘tkazdi.