AQShning Kaliforniya, Vashington va Nyu-York shtatlari gubernatorlari AQSh prezidenti Donald Tramp AQSh iqlim bo‘yicha Parij kelishuvidan chiqishini e'lon qilganiga qaramasdan, bu kelishuv maqsadlariga sodiq qolishlarini ma'lum qilishdi. Bu haqda Hill nashri xabar bermoqda.
Avvalroq Tramp kelishuvdan chiqish qarorini ma'lum qildi. Uning fikricha, kelishuv AQShga nisbatan "o‘ta adolatsizdir" va uning iqtisodiy manfaatlariga putur yetkazib, Xitoy va Hindiston kabi boshqa davlatlarni boyitadi. Tramp Parij kelishuvi o‘rniga yangi bitim tuzishni taklif qildi. Uning fikricha, bu bitim AQShga nisbatan adolatliroq bo‘ladi.
"Prezident iqlim o‘zgarishi xayol ekanligini aytgan, bu esa dunyoning barcha olimlariga ochiqchasiga qarshi borishdir", deb aytdi kelishuvdan chiqishga norozilik bildirayotgan uchta shtat rahbari nomidan Kaliforniya gubernatori Jyerri Braun. Ta'kidlanishicha, bu uchta shtatning umumiy iqtisodiyoti AQSh iqtisodiyotining beshdan bir qismini tashkil qiladi.
"Haqiqatga qarshi kurashish Amerika uchun ham, boshqa biror kim uchun ham yaxshi strategiya hisoblanadi, deb o‘ylamayman. Agar prezident o‘zboshimchalik bilan bu o‘ta muhim tashabbusdan voz kechishga qaror qilgan bo‘lsa, unda Kaliforniya va boshqa shtatlar o‘zlaricha yo‘l tutadilar", deb qo‘shimcha qildi Braun.
Gubernatorlar "AQShning iqlim alyansi" deb atalgan shtatlar koalitsiyasi Parij kelishuvining tamoyillariga amal qilishdan o‘zga maqsadlarni ko‘zda tutmaydi.
Vashington gubernatori Jyey Inslining aytishicha, iqlim bo‘yicha javobgarlik endi to‘liq shtat va shaharlar zimmasiga yuklanadi. Nyu-York gubernatori Endryu Kuomo o‘z navbatida Tramp ma'muriyatini "ular yetakchilikdan voz kechib, boshqa davlatlarga nisbatan bir qator orqaga o‘tirdilar", deb aybladi.
