Qatar «Al-Qoida» terrorchilariga pul to‘lagani oshkor bo‘ldi. Dohadagilar buni garovga olingan qirollik oilasi a'zolarini qutqarish evaziga to‘langan pul sifatida tushuntirishga urinishmoqda.
Financial Times’ning Qatar hukumati vakillari va dala qo‘mondonlariga asoslanib xabar berishicha, amirlik rahbariyati xalqaro terrorchilarga 1 milliard AQSh dollari to‘laganini tan olgan. Ta'kidlanishicha, bu pullar janubiy Iroqqa ovga borganida terrorchilar tomondan garovga olingan qirollik oilasi a'zolarini ozod qilish uchun tuzilgan kelishuvning bir qismi bo‘lgan.
Manbaning so‘zlariga ko‘ra, pullar Qatar qirollik oilasining a'zolarini ozod qilishdan tashqari, Suriyada ekstremistlar tomonidan hibsda saqlanayotgan yana 50 kishini ozod qilish uchun ham ishlatilgan. Dohada aytilishicha, pullar «Al-Qoida» bilan bog‘liq terrorchilik guruhlariga ham, Eron hukumatiga ham berilgan.
FT’ning qatarlik manbalari kelishuv aprel oyida amalga oshirilganini ta'kidlashmoqda.
5 iyunda bir qator arab davlatlari Qatar bilan diplomatik aloqalarni uzishlarini e'lon qilishdi. Ular orasida Saudiya Arabistoni, Liviya, BAA, Bahrayn, Misr kabi davlatlar bor. Ular o‘z qarorlarini Qatar rasmiy hukumati IShID va «Musulmon birodarlar» kabi terrorchilik tashkilotlarini qo‘llab-quvvatlagani bilan tushuntirishgan.
5 iyun kuni Saudiya Arabistoni hukumati o‘z hududida Qatarning «Al-Jaziyra» telekanali ofisini yopib qo‘ygan. Telekanal Fors ko‘rfazi davlatlari koalitsiyasiga qarshi harakat qilayotgan husiychilar lashkarlari faoliyatini qo‘llab-quvvatlagani bunga sabab qilib ko‘rsatilgan.
