Buyuk Britaniyada muddatidan oldingi parlament saylovlari boshlandi

Bugun, 8 iyun kuni Buyuk Britaniyada muddatidan avvalgi umummilliy saylovlar o‘tkazilmoqda.

Mahalliy vaqt bilan soat 07:00da (Toshkent vaqti bilan soat 11:00) boshlanadigan ovoz berish 22:00ga qadar (Toshkent vaqti bilan 9 iyun kuni soat 02:00) ovoz berish jarayoni yakunlariga ko‘ra 650 nafar deputatdan iborat Jamoa palatasining yangi tarkibi aniqlanadi.

Birlashgan Qirollik hududida 40 mingdan ortiq saylov uchastkalari tashkil qilingan.

Hukumatdagi Tereza Mey boshchiligidagi Konservativlar partiyasidan tashqari saylovlarda yana asosiy uch siyosiy kuch ishtirok etmoqda: Leyboristlar partiyasi (yetakchisi — Jyeremi Korbin), Liberal-demokratik partiya (yetakchisi — Tim Ferron) va Shotlandiya milliy partiyasi (yetakchisi — Nikola Sterjyen). Shuningdek, Jamoa palatasidagi 650 o‘rin uchun Yashillar, uelsliklarning "Playd Kamri" ("Uels partiyasi") va shimoliy irlandiyaliklarning 4 partiyasi: Demokratik yunionlar, Sotsial-demokratik leyboristlar, Olster yunionlar partiyasi va Shinn Feyn partiyalari kurashadi.

Bu keyingi 3 yil ichida britaniyaliklar uchinchi marta umummilliy saylovlarda ovoz berishi bo‘lmoqda: avvalgi parlament saylovlari 2015 yilda o‘tkazilgan, 2016 yil yozida mamlakatning YeIga a'zoligi masalasida referendum bo‘lib o‘tgandi.

Jamoa palatasini tarqatib yuborish va 8 iyun kuni mamlakatda umummilliy saylovlar o‘tkazish niyatini Tereza Mey 18 aprel ma'lum qilgan edi.

Bosh vazir o‘zining bu qarorini deputatlar orasida Buyuk Britaniyaning Yevropa Ittifoqi tarkibidan chiqishi masalasida birdamlik yo‘qligi bilan izohlagan edi.

Buyuk Britaniyaning YeIdagi a'zoligi bo‘yicha referendum o‘tgan yilning 23 iyun kuni bo‘lib o‘tgan, unda 51,9 foizlik natija bilan yevrointegratsiyaga qarshi bo‘lganlar g‘alaba qozongandi. 2017 yilning 29 mart kuni esa Britaniya bosh vaziri Tereza Mey Yevropa kengashi rahbari Donald Tuskka maktub yuborib, unda YeIdan chiqish jarayoni boshlangani haqida ma'lum qildi. O‘sha paytdan boshlab YeI to‘g‘risidagi Lissabon kelishuvining 50-moddasi kuchga kirdi hamda Buyuk Britaniyaning hamjamiyatdan chiqish bo‘yicha ikki yillik muzokaralar jarayoniga (Brexit jarayoni) start berildi.