Osiyo mintaqasidan JCh–2018 turniriga saralash bosqichi A guruhi, 8-turida O‘zbekiston terma jamoasi safarda Eron futbolchilariga qarshi bahs yuritadi. Bellashuv 12 iyun, dushanba kuni Tehron shahridagi “Ozodi” stadionida bo‘lib o‘tadi. O‘yin Toshkent vatqi bilan 21:45 da boshlanadi.
O‘FF matbuot xizmati jamoalar o‘rtasidagi o‘zaro o‘yinlar statistikasi, tarkibdagi yo‘qotishlar va bo‘lajak o‘yinga oid boshqa ma'lumotlarni taqdim qildi.
O‘zaro uchrashuvlar
O‘zbekiston va Eron shu kungacha 7 marta o‘zaro to‘qnash kelgan. Forslar 5 o‘yinda g‘alaba qozongan bo‘lsa, bitta uchrashuvda O‘zbekiston milliy terma jamoasi zafar quchgan. Yana bir o‘yinda murosa ko‘chasi tanlangan. O‘zbekiston milliy terma jamoasining Eronga qarshi yagona g‘alabasi 2012 yili Tehronda qayd etilgan.
Jamoalar o‘rtasidagi barcha o‘yinlar natijasi
14.12.1998 O‘zbekiston – Eron 0:4 | Osiyo o‘yinlari 1/4 final
11.07.2007 Eron – O‘zbekiston 2:1 | Osiyo Kubogi, guruh bosqichi
05.09.2009 O‘zbekiston – Eron 0:0 | O‘rtoqlik o‘yini
03.06.2012 O‘zbekiston – Eron 0:1 | JCh–2014 saralashi
14.11.2012 Eron – O‘zbekiston 0:1 | JCh–2014 saralashi
11.06.2015 O‘zbekiston – Eron 0:1 | O‘rtoqlik o‘yini
06.10.2016 O‘zbekiston – Eron 0:1 | JCh–2018 saralashi
Bo‘lajak o‘yinga tayyorgarlik
O‘zbekiston milliy terma jamoasi Eronga qarshi o‘yin oldidan 6 iyun kuni Toshkentda Tailand termasi bilan kuch sinashdi. Temurxo‘ja Abduxoliqov va Sardor Rashidovning gollari O‘zbekistonga 2:0 hisobidagi g‘alabani olib keldi.
Eron termasi 4 iyun kuni Podgoritsa shahrida Chernogoriya futbolchilariga qarshi bahs olib bordi. Sardor O‘zmunning dubli Karlush Keyrush jamoasiga 2:1 hisobidagi g‘alabani keltirdi.
Yo‘qotishlar
O‘zbekiston terma jamoasi safida bir qator yo‘qotishlar mavjud. Jumladan, Vitaliy Denisov, Islom To‘xtaxo‘jayev, Aleksandr Merzlyakov kabi futbolchilar Tailand va Eronga qarshi o‘yinlarda maydonga tushmasligi ancha oldin ma'lum bo‘lgan edi.
