Qatar Bahrayn ichki ishlariga aralashganini rad etdi

Qatar hukumati Bahrayn ichki ishlariga aralashgani haqidagi xabarlarni rad etdi.

Mamlakat TIVning xabar berishicha, Bahraynning BNA rasmiy axborot agentligi Qatar sobiq amiri Hamad bin Xalifa ol Soniyning maslahatchisi – Hamad bir Xalifa al-Atiyyaning Bahraynning “Vifak” partiyasi yetakchilaridan biri Hasan Ali Juma bilan suhbati matnini noto‘g‘ri talqin qilgan.

2011 yildagi suhbat matniga ko‘ra, rasmiy Doha go‘yoki “Vifak” partiyasini qo‘llab-quvvatlashga tayyorligini ma'lum qilgan hamda shu tariqa Bahrayn ichki ishlariga aralashmoqchi bo‘lgan.

Qatar TIVning xabar berishicha, 2011 yilda, Bahraynda norozilik namoyishlari yuz berganda, Doha mojaroda ishtirok etgan tomonlar o‘rtasida haqiqatdan ham vositachi bo‘lgan. Biroq barcha aloqalardan Manama hukumati xabardor bo‘lgan.

Shu bilan birga, Bahraynga qo‘shinlar kiritish haqidagi qarordan so‘ng, Dohaning vositachilik sa'y-harakatlari to‘xtatilgan. “Qatarning siyosati yaxshi qo‘shnichilik va boshqa davlatlar ichki ishlariga aralashmaslik prinsiplariga asoslangan”, - deya ta'kidlab o‘tishgan mamlakat tashqi siyosat idorasida.