Fransiyada yana ikki vazir iste'foga chiqdi

Fransiya hukumatini adliya vaziri Fransua Bayru va Yevroittifoq bilan aloqalar va tashqi ishlar vazirligi huzuridagi Yevropa ishlari vaziri Mariel de Sarnez tark etishdi. Bu haqda BFMTV yozmoqda.

20 iyun kuni Fransiya mudofaa vazirligi rahbari madam Silvi Gular ham ishdan ketish haqida ariza yozgani ma'lum qilingan edi. Barcha iste'folar prokuratura tomonidan «Demokratik harakat» (MoDem) partiyasining oliy toifali amaldorlari ustidan ochilgan dastlabki surishtiruvlar natijasida e'lon qilingani aytilmoqda. Yuqorida sanab o‘tilgan uch vazir turli vaqtlarda uning rahbariyati tarkibida bo‘lishgan.

9 iyun kuni Fransiya huquq-tartibot organlariga 2010 yilda madam Gularning Yevropa parlamentida yordamchisi bo‘lib ishlagan insondan ariza kelib tushgan. U maoshni bu vazifada olgan bo‘lsa-da, hech qachon o‘ziga tegishli vazifalarni bajarmagan ekan. Nomi oshkor qilinmayotgan ma'lumot beruvchining ko‘rsatmalariga ko‘ra, jami bo‘lib 12 nafar ana shunday soxta assistent Gular xonimga yordam bergan.

Surishtiruvchilar qo‘lida de Sarnezning ham ana shunday qoidabuzarliklarga yo‘l qo‘ygani xususida ma'lumotlar mavjud. Bayruga nisbatan surishtiruv ishlari olib borilmayapti. Biroq u MoDem rahbari sifatida qarorlar qabul qilishda o‘z hamkasblari bilan birdam bo‘lgan.

Bu uch siyosatchi 17 may kuni, Emmanuel Makron prezidentlik kursisiga o‘tirganidan so‘ng, o‘z lavozimlariga tayinlangan edi. 11 va 18 iyun kunlari Fransiyada parlament saylovlari o‘tkazildi va unda amaldagi davlat rahbarining tarafdorlari qonunchilik organida ko‘proq o‘ringa ega bo‘lishdi. Frantsuz qonunchiligiga ko‘ra, parlament saylovlaridan so‘ng hukumat iste'foga chiqariladi va yangidan shakllantiriladi.