Prezident Farg‘onada keksalar uchun avtobus ajratish zarurligini ta'kidladi

Prezident Farg‘ona viloyatiga tashrifining ikkinchi kuni Farg‘ona shahridagi Nuroniylar maskanida yaratilgan sharoitlar bilan tanishdi. Bu haqda O‘zA xabar bergan.

Farg‘onadagi Nuroniylar maskani Al-Farg‘oniy nomidagi madaniyat va istirohat bog‘ida barpo etilgan. Bu yerda keksalar uchun zarur bo‘ladigan barcha jihatlar e'tiborga olingan. O‘zbek va jahon adabiyotlari bilan boyitilgan kutubxona, zamonaviy sport anjomlari bilan jihozlangan sport zali, tibbiyot xonasi, fitobar, choyxona nuroniylar xizmatida. 

Mohir hunarmandlar qo‘lida sayqal topgan ayvonlar, naqshinkor ustunlar ijtimoiy markaz husniga husn qo‘shgan. 

Prezident bu yerdagi sharoitlarni yanada yaxshilash, xususan, keksalar uchun avtobus ajratish zarurligini ta'kidladi. Nuroniylarning yoshlar bilan ishlashining izchilligini ta'minlash, jamiyat ma'naviy barqarorligini mustahkamlashda ularning o‘rnini oshirish bo‘yicha tavsiyalar bildirdi.