Quvada 100 foiz foydali bo‘lgan anor sharbatlari ishlab chiqariladi

Quvalik mirishkor-tadbirkorlarning hisob-kitoblariga ko‘ra, bu yil tumanda 50 million tup mevali va manzarali ko‘chat yetishtirildi. Bu hazil gap emas. Azal-azaldan quvaliklar bog‘ yaratish maktabini butun respublikaga o‘rgatib kelishadi. Masalan, tumanda anorchilikka 30-yillarda asos solingan bo‘lsa, bugungi kelib tajribali bog‘bon Masturaxon Sayfutdinova yetakchiligida Quva dasht-adirlari, toshliq yerlariga anor ko‘chatlari ekilib bu sohada yangicha bosqichga kirishildi.

Bugun Quva-Farg‘ona-Marg‘ilon yo‘llari, Quva-Shahrixon-Marhamat yo‘llarida quvaliklarning yaratuvchanlik mo‘'jizalariga guvoh bo‘lasiz. Ha, bitta urug‘ni yerga qadab, uni ko‘kartirib, payvandlab, mevali ko‘chatga aylantirish uchun ham katta sabot, mehnatga ijodkorona yondashuv kerak.

Quva tumani Farg‘ona vodiysining chinakam durdonasidir. Bu yerning dehqonlari mehnatsevarligi bilan nom qozongan. Ayniqsa, anor yetishtirish borasida ularning oldiga tushadigani yo‘q. Shu bois Quva anorlari nafaqat yurtimiz, balki xorijda ham ma'lum va mashhur. Ayni paytda tumandagi “Anor” ixtisoslashtirilgan agrofirmasi tarkibidagi 150 dan ziyod fermer xo‘jaligida ushbu kuz ne'matining 30 dan ortiq turi parvarishlanayapti.

E'tiborlisi, yetishtirilgan hosilning ichki ehtiyojdan ortgan qismi Koreya, Rossiya singari mamlakatlarga eksport qilinmoqda. Ayniqsa, bu borada tajribali Masturaxon opa Sayfuddinova yetakchilik qilayotgan fermer xo‘jaligi a'zolarining hissasi katta bo‘ldi. Jamoa Karkidon qirlarida yaratgan anorzordan mo‘l hosil olish istagida. Kelgusi yillarda yana 2 ming gektar maydonga o‘tqazilgan ko‘chatlar ham meva bera boshlaydi.

Bu yil Quva tumanidagi “Farg‘ona anorzori” mas'uliyati cheklangan jamiyatida 50 gektarda yangi anorzor barpo etilgan. Anorzor qator oralariga pomidor, bodring, bulg‘or qalampiri va boshqa sabzavotlar, dukkakli ekinlar ekilgan.  Agrofirma tomonidan kelgusi yillarda anorzorlarni 2 ming gektarga, hosildorlikni 30 ming tonnaga yetkazish mo‘ljallanmoqda. Prezidentimiz Farg‘onadagi tashrifi chog‘ida Quva va Dashnobod anori dunyoga mashhur ekani, har ikkala navning o‘ziga yarasha xususiyatlari mavjudligini ta'kidladi. Anor chiqitsiz mahsulot bo‘lib, po‘stlog‘idan kimyo sanoatida rang olishda, farmatsevtikada xomashyo sifatida foydalanish mumkin. Viloyatda anorzorlarni kengaytirish va ushbu mahsulot eksportini ko‘paytirish yuzasidan mutasaddilarga tegishli tavsiyalar berilgan edi. Bu borada Masturaxon opa Sayfuddinova allaqachon harakatni boshlab yuborgan. 

Masturaxon opa Sayfuddinova tashabbusiga ko‘ra, xorijdan sharbat ishlab chiqarishga ixtisoslashgan yangi texnologiya olib kelinadi. Endilikda tabiiy va 100 foiz foydali bo‘lgan anor sharbatlari Farg‘ona viloyatining Quva tumanida ishlab chiqariladi.   

Ahror Ziyo, Farg‘ona