Gamburg politsiyasi tarixidagi eng yirik operatsiya: politsiya G20 sammitiga tayyor

"Katta yigirmatalik" sammiti kabi yirik tadbirlar o‘tkazilmagan Gamburg shahri xavfsizlik choralarini tashkillashtirishga nemis puxtaligi bilan yondashdi.

Dunyoning eng yirik iqtisodiyotga ega davlatlari yetakchilari va bosh vazirlari keladigan  G20 sammiti Germaniyaning bu shahrida 7-8 iyul kunlari bo‘lib o‘tadi. 

Sammit vaqtida shaharda xavfsizlikni huquq-tartibot idoralarining 20 mingga yaqin xodimi, asosan boshqa federal yerlardan politsiyachilar ta'minlaydi. Barcha operatsiyalar Gamburg politsiyasi rahbarligi ostida o‘tadi. 

Politsiyachilar ixtiyorida mingga yaqin xizmat avtomobili, samolyot, kamida 17 ta politsiya vertolyoti, 62 ta ot, 213 ta it va ko‘plab to‘suvchi panjaralar bo‘ladi. Tasdiqlanmagan ma'lumotlarga ko‘ra, dronlar ham qo‘llanishi mumkin.   

4 mingga yaqin politsiyachi temir yo‘l vokzali va aeroport hududida bo‘ladi. Shahar porti va Elba daryosida ham patrul nazorati olib boriladi.  

"Bu Gamburg politsiyasi tarixidagi eng yirik operatsiyadir", deb aytgan shahar politsiyasi rahbari Ralf Martin Meyyer. Uning aytishicha, politsiya chaqiriqqa 30 soniyadan 1 daqiqagacha vaqt ichida reaksiya bildiradi.

Shaharda xavfsizlikni ta'minlash operatsiyasida Niderlandiya va Avstriyadan ham maxsus guruhlar ishtirok etadi, ular sammitga keladigan davlatlar rahbarlari va bosh vazirlari, delegatsiyalarning minglab a'zolarining shahar bo‘ylab xavfsiz yurishlari uchun javobgar bo‘ladilar.  

Sammit ishtirokchilari xavfsizligi maqsadida sammit o‘tadigan ko‘rgazma markazi atrofida 38 km lik xavfsizlik hududi tashkillashtiriladi. U o‘rtacha balandlikdagi metall panjaralar bilan o‘rab chiqiladi. Hududga kirish qat'iy cheklangan bo‘ladi.

Gamburgda sammit vaqtida ko‘plab namoyishlar o‘tishi kutilmoqda. Ulardan eng kattasida 50 mingdan 100 minggacha odam ishtirok etishi mumkin. Norozilik bildiruvchilar orasida atrof-muhitni muhofaza qilish va va iste'molchilar huquqlarini himoya qilish tashkilotlari vakillari, kasaba uyushmalar, huquq himoyachilari, o‘ng ekstremistlar, so‘llar bo‘lish kutilmoqda.

Germaniya ichki ishlar vaziri Tomas de Mezer xavfsizlik xizmatining Gamburgdagi sammitga tayyorgarlik darajasini yuqori baholadi. Uning ta'kidlashicha, osoyishta namoyishlarga ruxsat berilgan, zo‘ravonlik qo‘llanuvchi noroziliklar oldi olinadi. 

Shahar markazidagi do‘konlar peshoynalari yog‘ochlar bilan yopib chiqilmoqda, shahar aholisining o‘zi esa sammit vaqtida uyda qolishni afzal ko‘rishini aytmoqda, chunki bunday "xavfsizroqdir".