O‘zbekiston “Qarshi-Kitob” temir yo‘l liniyasini elektrlashtirishni boshlamoqda

O‘zbekiston “Qarshi-Kitob” temir yo‘l liniyasini elektrlashtirish” investitsion loyihasini yo‘lovchi poyezdlarining tezyurar harakatini tashkil etish bilan amalga oshirishni boshlamoqda.

O‘zbekiston Prezidenti Shavkat Mirziyoyev 2017 yilning 10 iyul kuni ushbu investitsion loyihani amalga oshirish bo‘yicha chora-tadbirlarni tasdiqladi.

Prezident qaroriga ko‘ra, loyiha 2017-2018 yillarda amalga oshiriladi.

Investitsion loyihaning taxminiy qiymati 58,87 mln dollarni tashkil etadi, deyiladi qarorda.

«O‘zbekiston temir yo‘llari» AJ ushbu loyihani amalga oshirish uchun o‘zining 18,58 mln dollarlik mablag‘larini yo‘naltiradi. «O‘zbekenergo» AJ esa 7,31 mln dollarlik sarmoya kiritadi.

Taxminan 14,06 mln dollar markazlashtirilgan sarmoyalar bo‘lsa, O‘zbekiston Respublikasi tiklanish va taraqqiyot Jamg‘armasi «O‘zbekiston temir yo‘llari» AJga 18,92 mln dollarlik kredit taqdim etadi.

Investitsion loyiha doirasidagi tashqi elektr ta'minoti obektlarini loyihalashtirish va qurish «O‘zbekenergo» AJ mablag‘lari hisobidan amalga oshirilmoqda.

O‘zbekiston rahbari investitsion loyiha ishtirokchilariga soliq va bojxona imtiyozlarini taqdim etdi.