Ijtimoiy tarmoqlarda Urganch shahrida «BYD Chazor» avtomashinasi bir necha transport vositasiga qasddan urilgani aks etgan video tarqaldi. Xorazm viloyati IIB hodisa yuzasidan rasmiy ma’lumot berdi.
Ma’lum qilinishicha, voqea 4-avgust kuni Urganch shahrining Istiqlol mahallasida sodir bo‘lgan. 2000-yilda tug‘ilgan Sh.B. va 1999-yilda tug‘ilgan X.B. o‘rtasida kelishmovchilik kelib chiqqan. Shundan so‘ng X.B. o‘z boshqaruvidagi qora rangli «BYD Chazor» avtomashinasi bilan Sh.B.ga tegishli «Cobalt», shuningdek, voqea joyida to‘xtab turgan yana bir «BYD Chazor» va «Damas» avtomashinalariga qasddan shikast yetkazgan.
Hodisa oqibatida odamlar jabrlanmagan, biroq uchta avtomashina texnik shikastlangan.
«Tashvish tugmasi» orqali kelib tushgan xabardan so‘ng ichki ishlar xodimlari zudlik bilan voqea joyiga yetib borib, huquqbuzarning harakatlarini to‘xtatgan va barcha ishtirokchilarni ichki ishlar bo‘limiga olib kelgan.
Hozirda mazkur holat yuzasidan Urganch shahar IIB tomonidan tergovga qadar tekshiruv o‘tkazilmoqda.
