Ispaniya politsiyasi Yevropol bilan hamkorlikda qo‘lga olinganlarni jonivorlarni tahqirlash, hujjatlarni soxtalashtirish, jamoat sog‘lig‘iga qarshi jinoyatlarni sodir etish, pullarni noqonuniy yo‘llar bilan o‘tkazish va jinoiy guruh a'zosi bo‘lish kabi jinoyatlarni sodir etganlikda ayblamoqda.
Mazkur surishtiruv 2013 yili Yevropada avj olgan ot go‘shti mojarosi bilan bevosita bog‘liq ekani ta'kidlanmoqda. O‘shanda, Irlandiya oziq-ovqat xavfsizligi davlat idorasi o‘zi o‘rgangan 27 ta hamburgerning 10 tasi tarkibidan ot go‘shti DNKlarini topgan edi.
Masalan, Buyuk Britaniyaning eng yirik chakana savdo tarmog‘i Tesco supermarketida sotilayotgan burgerlarning 29 foizida ot go‘shti aniqlangandi.
Qit'aning 16 mamlakatidagi iste'molchilarga mahsulot yetkazib beruvchi Fransiya kompaniyasi – Comigel ham mojaro markazida qolgandi. Uning mahsulotlarida mol go‘shti deb qadoqlangan, muzlatilgan yarim tayyor mahsulotlarning 60 foiz tarkibi ot go‘shtidan iboratligi fosh etilgandi.
Mojarodan so‘ng olib borilgan tekshiruvlar "ot go‘shtini ta'minlash sohasida mashhur bo‘lgan niderlandiyalikni aniqlashga imkon bergan", deyiladi Yevropol xabarida.
Keyinchalik, gumondorning jinoiy to‘da rahbari ekani aniqlangan. 2016 yilda ma'lum bo‘lishicha, otlar Ispaniya shimolidagi maxsus kushxonalarda so‘yilib, kerakli hujjatlar soxtalashtirilgach, Belgiyaga yuborilgan. Ispaniyadagi kushxonalardan olingan go‘shtlar tahlil qilingach, ot go‘shtlari asosan xorijga yuborilgani aniqlangan.
Jinoiy guruh yetakchisi Belgiyada qo‘lga olingan. Bundan tashqari, Fransiya, Portugaliya, Italiya, Ruminiya, Shveytsariya va Buyuk Britaniyada politsiya amaliyotlari o‘tkazilgan edi.
