Sergeli tumanida noma'lum kimsa yosh qizni pichoqladi

27 iyulda Toshkent shahri Sergeli tumani Sergeli-1 mavzesidagi kafelardan birida noma'lum kimsa yosh qizni pichoqlab qo‘ydi. Hozircha, bu voqea sababi noaniqligicha qolmoqda. Guvohlarning aytishicha, qizlar o‘zaro suv sepib turishgan vaqtda yaqin oradan o‘tib ketayotgan mast kishiga suv tegib ketadi. 

Boshqa guvohlarga ko‘ra, qiz kafeda do‘stlari bilan o‘tirgan vaqtda mast erkak unga tegajog‘lik qilgan. Bunga javoban qiz mast kishining yuziga suv sepib yuborgan. Shu bilan janjal kelib chiqqan. 

Guvohlarning aksariyati erkak kishi o‘zini juda g‘azab bilan tutganini, stullarni otib, fin pichog‘ini o‘ynatganini ma'lum qildi. Keyinroq u qizga hujum qilib, uni yaralagan va voqea joyidan juftakni rostlagan.

Foto: Facebook

Kafe mijozlari tez tibbiy yordamni chaqirishgan. Qiz shahar shifoxonalaridan biriga olib ketilgan. Uning ahvoli yaxshi ekani xabar qilingan.

Toshkent shahar IIBB Tergov bo‘limi vakili voqea yuzasidan surishtirish olib borilayotgani va gumondor qidirilayotganini bildirdi.

Toshkentdagi kafeda yuz bergan voqea yuzasidan 1 kishining ishi sudga oshirildi, 2 kishi ushlangan