Toshkent shahar hokimligining Vaziyatlar markazida Sergeli tumani maktablarida joriy etilgan SI Davomat raqamli tizimi taqdimoti oʻtkazildi.
Tizim taʼlim sifatini oshirish, oʻquv jarayonini muntazam tahlil qilish va oʻquvchilar davomatini nazorat qilishga moʻljallangan. Loyiha maktablardagi jarayonlarni raqamlashtirishning birinchi bosqichi sifatida taqdim etilmoqda.
SI Davomat darslarning tashkil etilishi, oʻquvchilar faolligi va oʻqitish usullarini fanlar, sinflar hamda oʻqituvchilar kesimida muntazam tahlil qilib boradi. Olingan maʼlumotlar oʻqituvchilarni uslubiy qoʻllab-quvvatlash, taʼlim sifatini baholash va KPI tizimini takomillashtirishda qoʻllanadi.
Smart-kameralar va Face ID texnologiyasi orqali oʻquvchilarning maktabga kelishi va darslarda qatnashishi avtomatik qayd etiladi. Tizim takroriy dars qoldirish holatlarini, shu jumladan, oʻquvchining muayyan fanlar boʻyicha mashgʻulotlarga muntazam kelmasligini aniqlash imkonini beradi.
Agar oʻquvchi uzrli sababsiz dars qoldirsa, uning ota-onasiga SMS-xabarnoma yuboriladi. Tizim «ERP Maktab» hamda Sogʻliqni saqlash vazirligining DMED tizimi bilan integratsiya qilingan. Shu sababli oʻquvchining kasallik tufayli dars qoldirgani avtomatik hisobga olinadi.
Ayni paytda SI Davomat Sergeli tumanidagi 26 ta maktabda ishlamoqda. Ularda jami 446 ta smart-kamera oʻrnatilgan.
Aprobatsiya natijalariga qarab, tizimni Toshkent shahridagi boshqa maktablarda ham bosqichma-bosqich joriy etish rejalashtirilgan.
