«Inter» futbolchisi «Chelsi» bilan o‘yinda maydon markazidan avtogol urdi

Milanning «Inter» klubi o‘yinchisi Joffrua Kondogbiya Xalqaro chempionlar kubogi doirasida «Chelsi»ga qarshi kechgan  uchrashuvida maydon markazidan o‘z darvozasiga gol urdi. Avtogol videosi YouTube’da joylashtirildi.

74-daqiqada hisob «Inter» foydasiga 2:0 ko‘rinishida ekanida Kondogbiya maydon markazi yaqinida to‘pni raqib bosimi ostida darvozabonga yo‘llashga qaror qilgan. Biroq futbolchining uzatmasi avtogolga aylangan: to‘p darvozabon ustidan o‘tib, «Inter»  darvozasidan joy olgan. 

Ko‘plab foydalanuvchilar bu gol yilning eng kulgili gollaridan biri nomiga da'vogarlik qilishi mumkinligini taxmin qilishgan.  

Singapurda o‘tgan uchrashuv 2:1 hisobida «Inter» foydasiga yakunlangan.