Niderlandiyada yarim mln yevrolik iPhone smartfonlarini o‘margan guruh ushlandi

Niderlandiya politsiyasi 5 o‘g‘ridan iborat jinoiy guruhni qo‘lga oldi. Ular harakatlanib ketayotgan furgondan yarim million yevrolik iPhone telefonlarini o‘g‘irlashda gumon qilinmoqda. Ushlanganlarning barchasi ruminiyaliklardir, deb xabar qilmoqda Associated Press.

G‘arazgo‘ylar telefonlarni o‘g‘irlash uchun modernizatsiyalashgan mikroavtobusdan foydalanishgan. Ular mikrovtobusda qimmatbaho elektronika mahsulotlarini olib ketayotgan furgonga yaqinlashgan. Shundan so‘ng, guruh a'zolaridan biri avtobus tomiga chiqib, uning kapotiga o‘tgan, so‘ngra furgon eshigidagi qulfni buzib kirgach, telefonlarni qutilari bilan mikroavtobusga irg‘itgan. 

Politsiya gumonlanuvchilarni Niderlandiya markaziy qismidagi parklardan birida hibsga olgan. U yerda ichida iPhone qutilari bo‘lgan avtobus ham topilgan. NLTimes nashrining yozishicha, mazkur jinoiy guruh 2015 yildan beri kamida 17 marotaba yuk mashinalarini shu usulda o‘margan.