Amerikaning 10 dan ortiq diplomati Kubada «akustik hujum»ga uchradi

Kubada «akustik hujum»ga uchragan amerikalik va kanadalik diplomatlar soni avval taxmin qilinganidan ko‘proqdir. Bu haqda CNN telekompaniyasi AQSh ma'muriyatining 2 nafar yuqori lavozimli mulozimiga asoslangan holda xabar qilmoqda. 

Ta'kidlanishicha, AQShning 10 dan ortiq diplomati va ularning oila a'zolariga hujum qilingan. Bundan avval atigi ikki kishiga shunday xuruj qilingan, deb hisoblanar edi. 

Amerikalik mulozimlarning so‘zlariga ko‘ra, ayrim hujumlar chog‘ida tovushli qurol Amerika diplomatlarining qarorgohlaridan uzoqda bo‘lgan. Shu bilan birga, tovushli hujumlar salbiy jismoniy hissiyotlar, bosh og‘rig‘i va eshitishning yo‘qolishiga sabab bo‘lgan. 

Avvalroq, AQSh davlat departamenti mamlakatdan ikki nafar kubalik diplomatni chiqarib yuborgan edi. Bunga amerikalik mulozimlar sog‘lig‘i bilan bog‘liq ayrim «hodisalar» asos sifatida ko‘rsatilgandi.