Gazchining nayrangi o‘tmadi

Elmurod Norbo‘tayevning uyiga “gazchi”lar keldi. Aytishlaricha, qarzdorlik 2 mln. so‘mdan oshibdi. Ana-mana deguncha, uyga ulangan truba tarmoqdan uzib tashlandi, deb yozadi “Huquq” gazetasi.

Buyog‘i ro‘zg‘orchilik, tabiiy gazning o‘rni bir kun o‘tar-o‘tmas bilindi. Ayoli ham “boring, qarzingizni to‘lasangiz to‘lang! Bo‘lmasa iltimos qilib, yoqtirib keling”, deb boshini qotirdi. 

Elmurod o‘zi bilan bir so‘m olmasdan, tavakkal qilib, gaz idorasiga yo‘l oldi.

-  Qarzingiz, mana 2 mln. 400 ming so‘m – dedi uni kutib olgan Abror To‘liyev.

-  Yo‘g‘-ye, bunchalikmasdir?! Yana bir ko‘ring, - unga iltijoli boqdi Elmurod.

Uning dardi vaziyatni tushuntirib, gazni ulatib olish edi. Abrorning niyati esa butunlay boshqa – bir nima undirish.

Xullas, ketmasdan turavergan Elmurodga Abror yo‘lini ko‘rsatdi. Aniqrog‘i, 400 dollar evaziga barchasini qoyil qilishini aytdi.

Elmurod biroz soddaligiga bordi va aytilgan pulni qarz-havola qilib yetkazdi. Abror esa aytganidek gazni ulab berdi. Biroq, Elmurodning quvonchi uzoqqa cho‘zilmadi. Yana gazchilar kelib, “qarzingiz 2 mln. 800 mingga yetibdi, uzmaslikning imkoni yo‘q”, deyishdi-da, uzishdi. Abror bergan ma'lumotnoma ish bermadi.

Fig‘oni falakka chiqqan Elmurod oyog‘ini qo‘liga olib, gaz idorasiga yugurdi.

Abror hech narsani tan olmadi. Elmurod bu haqda huquqni muhofaza qiluvchi idoralarga murojaat qildi.

Tergov davomida Abror To‘liyev Elmurodning keyingi qarzlarini ham qo‘shib to‘lab berdi. Biroq qing‘irligi jazosiz qolmadi. Sud hukmi bilan unga nisbatan tegishli jazo tayinlandi.