09:18 / 26.08.2017
10035

"Harvi" dovuli Texas shtati sohillariga yetib keldi

Foto: ABC news

"Harvi" AQShning Texas shtati qirg‘oqlariga yetib keldi. U bilan birga kuchli shamol va yomg‘ir ham kirib keldi, deb xabar bermoqda AQSh Dovullardan ogohlantirish milliy markazi (NHC).

"Katrina"dan keyingi 12 yil ichidagi kuchli dovul Texas shtatining Meksika ko‘rfazidagi sohillariga 25 avgust kuni yetib keldi. Sinoptiklarning taxminlariga ko‘ra, u bir necha kun mobaynida shtat hududida hukm suradi, surunkali yomg‘irlar suv toshqinlariga sabab bo‘lishi mumkin. 

Dastavval Korpus Kristi shahriga yetib kelgan kuchli yomg‘ir bilan birga davom etayotgan shamol reklama taxtalari va uylarning tomlarini uchirib ketmoqda. 

Qurbonlar haqida ma'lumotlar yo‘q, ammo Fox News telekanali efirida Rokport shahri hokimi Patrik Rayos "o‘z avtomobilini tark eta olmayotganlar haqida ma'lumotlar borligini aytgan". 

"Biz hech narsa qila olmaymiz. Biz hammani hududni tark etishga chaqirgan edik", — degan Rayos.

Bundan avval "Harvi" dovuliga 5 ballik shkala bo‘yicha 4 ball qo‘yilgan. U Texas shtati sohillariga soatiga 210 km tezlikda esayotgan shamolni keltirgan. 

"Harvi" allaqachon AQSh so‘nggi 12 yildagi eng kuchli dovul bo‘lishga ulgurdi. 2005 yilgi "Katrina"dovuli Luiziana shtatidagi Yangi Orleanni butunlay vayron qilgan edi. 

Top