O‘zbekistonlik talabalar nega Rossiyada sarson qoldi?

Toshkent davlat agrar universitetining olti nafar bitiruvchi talabasi Rossiya Federatsiyasining Chelyabinsk viloyatida tushunarsiz ahvolda qolmoqda. Gap shundaki, bitiruv imtihonlari muvaffaqiyatli topshirib, magistratura bosqichida o‘qish istagini bildirgan Toipov Farrux, Nazarov Sodiq, Abdurasulova Kamola, Oqboyev Abbos va uning do‘stlari Janubiy-Ural davlat agrar universitetida ta'lim olish uchun barcha hujjatlarini tayyorlay boshladi.

Aynan shu paytlar mazkur universitet Xalqaro bo‘limi boshlig‘i Sergey Vladimirovich Toshkentga tashrif buyurib, talabalarni magistratura talablari bilan tanishtirdi. Intiqib kutilgan onlar yetib kelgach, qishloq xo‘jaligining turli yo‘nalishlarida ta'lim olish uchun o‘zbekistonlik talabalar 25 avgust kuni Chelyabinsk viloyatiga yetib kelishdi.

Ammo, barchasi yosh talabalar kutgan darajada bo‘lmadi, avvaliga bakalavr diplomining nostrifikatsiya qilinmagani ro‘kach qilinib, ularni joriy o‘quv mavsumidan magistrantlar safiga qo‘shilmasligi aytib o‘tildi. Bundan tashqari, Rossiyadagi Janubiy-Ural davlat agrar universiteti rahbariyati o‘zbekistonlik talabalarni yotoqxonaga qo‘ymagan. Tushunmovchilikning asl sababi Rossiya ta'lim tizimida yangi joriy qilingan diplomni nostrifikatsiya qilish sharti bo‘lgan, xolos. Biroq, O‘zbekiston Respublikasi Qishloq va suv xo‘jaligi vazirligi o‘quv ishlar bo‘lim boshlig‘i Shakarboy Joniqulovning aytishicha, bitiruvchi talabalar Rossiyada boshpanasiz qolmagan.

"Biz barcha imkoniyatlarni ishga solyapmiz, Jan.UAU mehmonxonasida bizning talabalar uchun joy ajratildi. Ayni paytda o‘sha universitetda ta'lim olayotgan va amaliyotda bo‘lgan vakillarimiz orqali olti talabaning oziq-ovqat va ehtiyojlarini qondirishni rejalashtirganmiz. Tez fursatlarda uyga qaytish, avia chiptalarni xarid qilish ustida bosh qotirmoqdamiz”, deydi u.

Shuningdek, Shakarboy Joniqulov yuqorida nomi zikr etilgan talabalardan faqat ikkitasining vazirlik tavsiyanomasiga ega bo‘lganini ta'kidlab o‘tgan. Demak, qolgan yoshlar o‘z xohishiga ko‘ra imtihon topshirib, chet davlatga ketishgan. KUN.UZ muxbiri masalaga oydinlik kiritish maqsadida, Toshkent davlat agrar universiteti Xalqaro bo‘lim xodimi Sanjar Adilov bilan bog‘landi.

"Biz vaziyat tafsilotlaridan to‘liq xabardor emasmiz, lekin shuni ayta olamanki, ular maxsus tavsiyanoma orqali ketmagan edi va hujjatlarni tayyorlashda o‘zlari mas'ul bo‘lgan”, deydi u.

Holatning boshqa bir tomonida olis yurtda, oilasidan uzoqda qolgan talabalar qismati qolmoqda. Aniqlanishicha, Oqboyev Abbos noma'lum sababga ko‘ra Rossiya Bojxona xizmati xodimlari tomonidan ushlab qolingan, ayni paytda u O‘zbekistonga qaytarib yuborilgan.

Rossiyada o‘qib, bilimlari bilan O‘zbekistonda xizmat qilishni ko‘zlagan yoshlar ishni puxta qilmagani tufayli tushunmovchilik va murosasiz holat yuzaga kelib qolmoqda, deb aybni bir tarafga qo‘ya olmaymiz.  Keyingi savol esa talabalar Toshkentga qaytib kelgach, nima bilan mashg‘ul bo‘ladi?

"Biz talabalarning O‘zbekistonga qaytib kelishi bilanoq ish bilan ta'minlaymiz. Har birining doimiy ro‘yxatdan o‘tgan hududi bo‘yicha ish o‘rnini hozirlab qo‘ydik”, deydi Shakarboy Joniqulov.

KUN.UZ voqealar rivojini kuzatib boradi hamda tezkorlik bilan yetkazib berishda davom etadi.