O‘zbekiston prezidenti Shavkat Mirziyoyev «Sharq taronalari» o‘n birinchi xalqaro musiqa festivalining ochilishiga bag‘ishlangan tantanali marosimda nutq so‘zladi. Prezidentning tabrik so‘zlari matni O‘zA tomonidan keltirilgan.
Assalomu alaykum, muhtaram mehmonlar!
Hurmatli festival qatnashchilari!
Xonimlar va janoblar!
Avvalambor, siz, azizlarni qadimiy va go‘zal O‘zbekiston zaminida, azim Samarqand shahrida samimiy qutlashga ruxsat bergaysiz.
Barchangizni “Sharq taronalari” xalqaro musiqa festivalining tantanali ochilishi bilan chin qalbimdan muborakbod etaman.
Bugungi marosimda Birlashgan Millatlar Tashkiloti Bosh kotibining o‘rinbosari, Jahon sayyohlik tashkiloti bosh kotibi Talib Rifai, Yevropada Xavfsizlik va hamkorlik tashkiloti Parlamentlar assambleyasi raisi Kristin Muttonen, Islom hamkorlik tashkilotining Ta'lim, fan va madaniyat masalalari bo‘yicha tuzilmasi – AYSeSKO Bosh direktori Abdulaziz Usmon al-Tuvayjri janoblari kabi yuqori martabali mehmonlarimiz ishtirok etayotgani bizga alohida mamnuniyat bag‘ishlaydi.
Shuningdek, Islom tarixi, san'ati va madaniyatini o‘rganish bo‘yicha xalqaro markaz – IRSIKA bosh direktori Xalit Eren, Xalqaro folklor san'ati tashkilotining Osiyo mintaqasi bo‘yicha Bosh kotibi Mun Xyun Suk, Mustaqil Davlatlar Hamdo‘stligi Ijroiya qo‘mitasi raisi Sergey Nikolayevich Lebedev, Rossiya Federatsiyasi Prezidentining xalqaro madaniy hamkorlik bo‘yicha maxsus vakili Mixail Yefimovich Shvidkoy va boshqa qadrli mehmonlarimizni, xalqimizga hurmat ko‘rsatib, mana shunday anjumanlarimizda har safar ishtirok etib kelayotgan diplomatik korpus vakillarini samimiy qutlashdan baxtiyorman.
Fursatdan foydalanib, barcha festival ishtirokchilariga “Xush kelibsiz, Samarqand shahriga, xush kelibsiz, ona O‘zbekistonimizga!” deb yuksak hurmat va ehtiromimizni bildirishga ijozat bergaysiz.
Muhtaram do‘stlar!
Dunyoda qarama-qarshilik va ziddiyatlar kuchayib borayotgan bugungi o‘ta murakkab zamonda millati, tili va dini turlicha bo‘lgan millionlab odamlarni hech qanday tarjimonsiz do‘st qiladigan, ular o‘rtasida hamkorlik va hamjihatlikni yanada mustahkamlaydigan musiqa san'atining o‘rni va ta'siri tobora ortib bormoqda.
Shu ma'noda, “Sharq taronalari” xalqaro musiqa festivalining bu yilgi anjumani alohida mazmun va ahamiyatga ega bo‘lib, u festival tashkil etilganiga yigirma yil to‘lgan tarixiy bir sanada o‘tkazilmoqda.
