2017 yil 24 avgust kuni AQShning O‘zbekistondagi elchisi Pamela Spratlen qarorgohida elchixonaning yangi xodimlarini tanishtirish marosimi bo‘lib o‘tdi. Endilikda Jon Braun jamoatchilik bilan aloqalar bo‘yicha maslahatchi lavozimida, Kirsten Mishiner esa madaniy ishlar bo‘yicha vakil sifatida faoliyat olib boradi.
Kechaga AQShdan maxsus mehmon - "The Gina Chavez Band” guruhi tashrif buyurdi va ular o‘z qo‘shiqlari bilan mehmonlarga ko‘tarinki kayfiyat ulashishdi. Shuningdek, amerikalik guruh tomonidan "Choyxona" hamda "Samarqand go‘zali" taronalari kuylangani kechaga o‘zgacha zavq bag‘ishladi.
"The Gina Chavez Band” guruhi ayni damda Samarqand shahrida o‘tkazilayotgan "Sharq taronalari" xalqaro musiqa festivalida ham ishtirok etmoqda.
Ma'lumot o‘rnida: Toshkentdagi AQSh elchixonasi 2017 yil “Sharq taronalari” xalqaro musiqa festivaliga rasmiy ishtirokchi sifatida Amerikaning “The Gina Chavez Band” guruhini taklif etgan.
Jina Chavez Lotin Amerika va Amerika xalq qo‘shiqlarini ingliz va ispan tillarida ijro etuvchi xonanda va qo‘shiqchi-shoirdir. U xilma-xil musiqiy uslub, jumladan kumbia, pop, reggiton janrlari va boshqa xalq qo‘shiqlarini ikki tilda birday kuylaydi.
Jina Chavez guruhi 2015 yili Texasdagi “Austin Music Awards” tanlovida “yilning eng yaxshi musiqachisi”, “Up.Rooted” uchun “yilning eng yaxshi musiqiy albomi”, “Siete-D” uchun “yilning eng yaxshi qo‘shig‘i”, “eng yaxshi lotin amerikacha guruh” kabi nominatsiyalarda g‘olib, musiqiy faoliyat va ta'lim sohasidagi Esme Barrera nomidagi mukofot sohibi, oltita kategoriya bo‘yicha tanlov sovrindori bo‘lgan.
