Farg‘onada yana bir muammoli tungi klub

KUN.UZ fuqarolar bilan ishlash, ularning muammolarini o‘rganish, murojaatlari bo‘yicha tahlil qilib, unga yechim izlamoqda. Furqat tumanining markazida RIO klubi faoliyat olib boradi. Bu klub tadbirkor Alisher Mahmudovga tegishli bo‘lib, mazkur manzilni to‘y va turli marosimlarni o‘tkazish maqsadida ochgan va litsenziyani qo‘lga kiritgan. Faoliyati esa tungi 22:00 ga qadar olib borilishi ko‘zda tutilgan.  

Biroq, bizga kelib tushgan murojaatda RIO klubi, tong 03-04ga qadar faoliyat olib borayotgani, to‘y va turli marosimlar emas, disko klubga aylangan, bu yerda balog‘atga yetmagan yoshlar faoliyat olib borishi, ayrim mast kimsalar dastidan klub yonida istiqomat qiluvchi aholi tinchligi buzilganligi aytilgan. Mazkur muammoni o‘rganish maqsadida Furqat tumani hokimi o‘rinbosari, Ommaviy tadbirlarni tashkil etish va o‘tkazish komissiyasi raisi Bahodir Abdullayev bilan bog‘langanimizda muammo 2 kun ichida yechim topishini aytib o‘tdi.
  
2 kundan so‘ng B.Abdullayev bilan yana bog‘langanimizda, bu muammo bo‘yicha tuman DSI boshlig‘i A.Qosimovga tadbirkorning litsenziyasini o‘rganish bo‘yicha xat chiqarganini aytdi. 

Kuzatuvimiz shuni ko‘rsatdiki, chindan ham tadbirkorning litsenziyasida tungi 22:00 ga qadar faoliyat olib borishi ko‘zda tutilgani, tadbirkor esa noqonuniy tarzda tonggi 04:00ga qadar faoliyat olib borilayotgani aniqlandi. Tuman hokimligidan aniq javob kelmaganidan so‘ng, muammo bo‘yicha Furqat tumani DSI hodimi Davlat Xalilov bilan bog‘landik. Davlat Xalilov ham muammoni 3-4 kunda hal etishi, disko klub faoliyatini 22:00ga qadar yurgazishini va'da berdi. Biroq, 4 kun o‘tganidan so‘ng ham muammo muammoligicha turganini shu klub hududida istiqomat qiluvchi fuqarolar aytib o‘tdilar. 

Xo‘sh RIO majmuasi (disko klubi)da qachongacha balog‘atga yetmagan o‘smirlar faoliyat olib boradi? Qachongacha shu hududda istiqomat qilayotgan fuqarolar mast kimsalar dastidan tinchliklarini yo‘qotadilar? Lisenziyasida 22:00 ga qadar faoliyat olib borilishi ko‘zda tutilgan tungi klub qachon adolat yuzasida ishlaydi? Bu savollarning javobi biz uchun ham qiziq. Muammo yechim topishi uchun izlanishdamiz. Demak, mavzuga yana qaytamiz. 

Ahror Ziyo, Farg‘ona