Bir tashkilotda ikkita lavozimda ishlash uchun haq to‘lash tartibi

SAVOL: Bir korxonada ikkita lavozimda ishlaganligi uchun ish haqi to‘lash qanday amalga oshiriladi?

Botirxon Utepbergenov.

JAVOB: Mehnat kodeksining 160-moddasiga asosan bir necha kasbda (lavozimda) ishlaganlik, o‘rindoshlik asosida ishlaganlik uchun, xizmat ko‘rsatish doirasi kengayganligi, bajariladigan ishlar hajmi ortganligi uchun xodimlarning mehnat haqi miqdori mehnat shartnomasi taraflari o‘rtasidagi kelishuvga ko‘ra belgilanadi.

O‘zbekiston Respublikasi Vazirlar Mahkamasining 2012 yil 18 oktabrdagi 297-son qarori bilan tasdiqlangan «O‘rindoshlik asosida hamda bir necha kasbda va lavozimda ishlash tartibi to‘g‘risida»gi nizomga muvofiq, kasblar va lavozimlarda o‘rindoshlik asosida ishlaganlik, xizmat ko‘rsatish zonasini kengaytirganlik, ishlar hajmini ko‘paytirganlik uchun xodimlarga qo‘shimcha haq to‘lash miqdori, agar jamoaviy shartnomada yoxud ish beruvchi tomonidan kasaba uyushma qo‘mitasi yoki xodimlarning boshqa vakillik organi bilan kelishgan holda qabul qilingan boshqa ichki hujjatda o‘zgacha tartib nazarda tutilmagan bo‘lsa, tomonlarning kelishuvi bo‘yicha belgilanadi.

Byudjyet tashkilotlarida kasblar va lavozimlarda o‘rindoshlik asosida ishlaganlik, xizmat ko‘rsatish zonasini kengaytirganlik, ishlar hajmini ko‘paytirganlik uchun qo‘shimcha haq to‘lash miqdori o‘rindoshlik bo‘yicha ishlanayotgan lavozim bo‘yicha maoshning (tarif stavkasining) 30 foizidan ortiq bo‘lishi mumkin emas.

Savolga huquqshunos Nafisa Usmonova javob berdi.

Eslatma: «Yuridik xizmat minbari»da savollarga berilayotgan javoblar tavsiyaviy xarakterga ega.