Fransiya. «PSJ» g‘alabasiga raqibning o‘zi yordam berdi

Fransiya chempionatining 6-turidan o‘rin olgan so‘nggi uchrashuvda «PSJ» «Lion»ni qabul qildi.

Uchrashuvning birinchi bo‘limida hisob ochilmadi. 75-daqiqaga kelib, parijliklarning o‘zi gol uravermagach, «Lion» himoyachisi Marselo o‘z darvozasiga to‘p kiritib qo‘ya qoldi. 79-daqiqaga kelib Edinson Kavani penalti tepish imkoniyatiga ega bo‘ldi, lekin bu vaziyatdan urugvaylik futbolchi foydalana olmadi. 86-daqiqada esa yana «Lion» himoyachisi, bu safar Jyeremi Morel o‘z darvozasini ishg‘ol qildi va «PSJ»ga ishonchli g‘alaba uchun ko‘maklashib yubordi.

Ushbu g‘alabadan keyin «PSJ» hisobidagi ochkolar soni 18taga yetdi va jamoa turnir jadvalida yakka peshqadam bo‘lib turibdi. «Lion» esa 11 ochko to‘plagan holda, 5-pog‘onaga joylashgan.

Fransiya chempionati, 6-tur

PSJ – Lion 2:0 (0:0)
Gollar: Marselo (75, avtogol), Morel (86, avtogol).
PSJ: Areolya, Dani Alves, Tiago Silva, Kimpembe, Kurzava (Berchiche, 73), Motta, Rabo, Mbappe, Draksler (Lo Chelso, 72), Neymar, Kavani.
Lion: Antoni Lopesh, Tete, Marselo, Morel, Mendi, Tuzar, Ndombele (Martinsh Pereyra, 72), Traore, Fekir, Depay (Auar, 90), Dias (Korne, 63).
Ogohlantirishlar: Motta (45), Fekir (55), Neymar (76), Mendi (79), Tiago Silva (81).